Atualità
Videospots, videoclips y drohne: workshop tl Museum Ladin a San Martin
L Museum Ladin mët a jì en cunlaurazion cun l Servij ai Jogn dla Val Badia n workshop per jëuni danter i 14 y 20 ani per mparé a fé videospots y videoclips nce tres l’adurvanza de n drohne. L curs unirà fat dai 14 ai 20 de fauré dl 2015 y à n priesc simbolich de 10 Euro. Se nuté su possen pra l Sorvij ai Jogn dla Val Badia entro i 5 de fauré 2015.
L fin ie chël de realisé cun pitla grupes de lëur videospots y videoclips sun l museum. I jëuni unirà acumpaniei da esperc te deplù ciamps. Nsci saral esperc che mostra l’adurvanza de n drohne, coche n possa l’adurvé per fé films, ciuna puscibiliteies che chësc nuef mesum nes pieta y ciuna che ie la normativa che regulea dal 2015 inant l‘adurvanza de n drohne. Oradechël puderan mparé a se dé ju cun la grafica y design per video, filmé y mëter adum n pitl spot o film, taië l film tres l’aiut de programs tl Ufize per mesums audiovisuei de Bulsan. N cunlaurazion dl studio Davide Records puderan taië pro l audio per l mëter ite te n filmat ma nce taië files audio y toc de mujiga y mparé a capì tan inant che n muessa tenì ite i derc de autur sce n tol files video, audio o fotos de d’autri.
L curs unirà fat dai 14 ai 20 de fauré dl 2015 y à n priesc simbolich de 10 Euro. L workshop scumencerà la sada ai 14 de fauré y jirà inant dal lunesc 16 de fauré nchin l vënderdi ai 20/02. L merdi de carnescià ai 17/02 domesdi, ne unirà l curs nia fat. L orar tenirà cont di culegamënc dla curiera sibes per l'Alta Badia che nce per i partezipanc de Al Plan. Dala ncrujiada de San Martin nchin al ciastel uniral metù a jì n pulmino.
Se nuté su possen pra l Sorvij ai Jogn dla Val Badia entro i 5 de fauré 2015. Per nfurmazions plu avisa o per giaté l program possen cuntaté l Museum Ladin Ciastel de Tor a San Martin sota l nr. de tel. 0474 524020, o nce l Sorvij ai Jogn dla Val Badia cherdan su al nr. 0474 523070.
rc
