Atualità
Cultura Ladina: Proieć, concursc y scomenciadies tl 2015
Proieć culturai y n concurs artistich en gaujiun dl centenà dla Pröma Vera Mondiala, la promoziun dla leteratöra ladina, le Dé dla Cultura Ladina y la lege nöia che reverda la promoziun dla cultura sarà cater dles tematiches zentrales dl Departimënt Educaziun y Cultura Ladina tl ćiamp cultural por l’ann 2015.
Por l’ann 2015 él preodü na seria de ativitês culturales che gnarà metüdes da jì dala Repartiziun Cultura Ladina dl Departimënt Educaziun y Cultura Ladina de Südtirol: öna dles scomenciadies prinzipales reverda n proiet scolastich d’elaboraziun storica dl centenà dla Pröma Vera Mondiala tles scores mesanes y altes dles valades ladines. „Cun chësta scomenciadia oressun sensibilisé y aumentè la conescënza di scolars sön öna dles tragedies plü doloruses y crödies dl 20ejimo secul y sotlignè insciö l’importanza dl valur dla pesc y dla convivënza pazifica t’Europa y tl monn“, recorda l’assessur por la cultura ladina Florian Mussner y ajuntëia che les esperiënzes di soldas y dla popolaziun gnarà analisà tolon en conscidraziun i trëi aspeć d’influënza che la Pröma vera mondiala à albü sön les porsones, sön la sozieté y sön l’ambiënt.
N contribut por l’inrescida storica di scolars é inće la publicaziun nöia dal titul „La Pröma Vera tla Ladinia“de Magdalena Miribung che analisëia danter l’ater la pröma vera mondiala en general y tles Dolomites. Le material didatich po gnì desćiarié dala plata internet dl’Europaregiun „La Pröma Vera Mondiala: Recordè, inrescì, capì“ (http://www.14-18.europaregion.info/it/didattica.asp) che é gnüda metüda sö aposta sciöche lerch d’analisa coletiva por scolars y studënć de cultures desvalies por inrescì deboriada les tematiches che reverda i avenimënć dla pröma pert dl 20ejimo secul. I proieć culturai che vëgn laurà fora tratan l’ann scolastich gnarà spo presentà te na forma artistica tla secunda pert dl’ann scolastich.
Na secunda scomenciadia, tres en recordanza dl centená dl scomenciamënt dla vera, é n concurs artistich che vëgn metü a jì dala Repartiziun Cultura Ladina y che é gnü valuté positivamënter dala Consulta Ladina. „La tematica zentrala sarà la relaziun danter la vera y la pesc te n contest europeich“, spliga le diretur dla Repartiziun Cultura Alexander Prinoth. Le concurs gnarà organisé cun le „Südtiroler Künstlerbund“.
La promoziun dla leteratöra ladina y dla leteratöra por i jogn sarà implü n’atra priorité di proscims mëisc. „Cun la traduziun de operes leterares él stè l’Assessorat por la scora y cultura ladina che à sostignì cun plü scomenciadies ti ultims agn la defujiun dla leteratöra ladina“, à recordè l’assessur Mussner che sotlignëia che la promoziun dla produziun leterara ladina gnarà renforzada inće tl dagnì cun mosöres che jarà a bëgn di auturs y leturs de operes leterares. Por sostignì la leteratöra por jogn él preodü la traduziun tl ladin de döes operes dla leteratöra mondiala por jogn al’ann.
Tl 2015 gnaral inće laurè sön na proposta de lege nöia che reverda la promoziun dla cultura di trëi grups linguistics. „Al gnarà mudé la lege provinziala nr. 45 dl 1976 y la lege provinziala nr. 7 dl 1958 cun na lege organica nöia sön la cultura“, spliga le diretur Prinoth. La Repartiziun dla Cultura Ladina se fistidiëia inće tres so ofize di contribuć provinziai por l'ativité culturala, investimënć, proieć culturai, ativitês artistiches y de formaziun sciöche inće dl’organisaziun dl Dé dla Cultura Ladina.
rc
