Atualità
Sentënza dl Tribunal amini.: Contribuć dal'UE ma sce la munt vëgn laurada
La pratica da tò adinfit les munts zënza garantì n'ativité produtiva ma por ciafè finanziamënć dal’Uniun Europeica é gnüda proibida chisc dis cun na sentënza dl tribunal aministratif dla regiun dl Lazio. L’assessur provinzial Arnold Schuler à tut sö positivamënter chësta dezijiun.
Por l’assessur por l’agricoltöra Arnold Schuler é „la dezijiun definitiva dl tribunal aministratif dla regiun dl Lazio (TAR) positiva, deache la pratica da tò adinfit les munts zënza zënza garantì n'ativité produtiva ma por ciafè finanziamënć dal’Uniun Europeica menâ fora n messaje tla direziun daldöt falada.“
Tles regiuns dl Abruzzo y dles Marche, mo inće tles provinzies de Trënt y tl Südtirol êl dantadöt de gran aziëndes agricoles che se tolô adinfit da agn de gran pastöres, ma por ciafè na soma alta de finanziamënć da pert dl’Uniun Europeica. Por che le contribut gniss conzedü messâl gnì desmostrè na soma prezisa de hectar de spersa dles munts. Inće tl Südtirol gnôl tut adinfit munts da interessënzes y paié fić ma por che al gniss paié fora finanziamënć dal'Uniun europeica. Por i prioprietârs dles munt portâ para chësta pratica de bun davagns.
Por smendrì chësc fenomenn à l’Agenzia por les erogaziuns tl’agricoltöra (Agea) menè fora na zircolara che dal 1 de jenà dl 2014 ne podôl nia plü gnì paié premies por pastöres olache al gnô ma vardè tiers foresć. Do n recurs al tribunal aministratif é chësta mosöra dl’Agea gnüda sospenüda y porchël ê chësta pratica por döt l’ann 2014 conzedüda.
La sentënza dl TAR dl Lazio de chisc dis ti à dè definitivamënter rajiun al’Agea, y insciö ne é la pratica da tò adinfit munts zënza garantì n'ativité produtiva ma por ciafè finanziamënć dal’UE nia plü conzedüda. Na domanda por premies gnarà ma plü azetada sce la munt vëgn inće laurada.
rc
