Atualità
Scores altes ladines: Confermades les trëi Direziuns
Garantì les poscibilitês de formaziun adatades al sistem dla scora paritetica y mantignì l’atrativité dles scores altes ladines inće tl dagnì: Chisc dui obietifs é gnüs confermà da püch (27/01) dala Junta provinziala cun l’aprovaziun dl plan de destribuziun dl’oferta de istruziun y formaziun dles scores altes y direziuns tles valades ladines por i proscims cinch agn.
„L’aprovaziun dl’oferta de formaziun atuala dles scores altes tles valades ladines garantësc inće tl dagnì por i studënć na seria de poscibilitês d’istruziun do i prinzips dla scora paritetica diretamënter söl post tla Val Badia y te Gherdëna“, dij l’assessur por la scora ladina Florian Mussner do che la Junta provinziala à aprovè en mertesc ai 27 de jenà le plan teritorial de distribuziun dl’oferta de formaziun dles scores altes y confermè les trëi direziuns y 12 seziuns de secundo livel tles localitês ladines (ITE Raetia y Lizeum d’Ert Cademia a Urtijëi y l’ITE cun lizeum a La Ila) por i proscims cinch agn.
Cun l’aprovaziun da pert dla Junta él gnü confermè tl plan teritorial dles localitês ladines la direziun dl Istitut Tecnich Economich „Raetia“ (cun les seziuns Aministraziun, finanza, marketing, Turism y Sport) y la direziun dl Lizeum d’Ert „Cademia“ (cun les seziuns Ert figurativa, Grafica y Design) cun la scora profescionala por l’artejanat artistich (cun les seziuns Scoltöra y Pitöra decorativa). Implü él gnü confermè la direziun dl Istitut Tecnich Economich da La Ila (cun la seziun Aministraziun, finanzes y marketing) y cun le lizeum (cun les seziuns Sciënzes umanes y Lingać). Por merit dl’organisaziun dles trëi direziuns él na pert dles leziuns dles seziuns desvalies che vëgn tignides adöm por düć i studënć y che comporta insciö n sparagn tres n’otimisaziun dles ressures dl personal didatich a desposiziun.
„Ti ultims agn ùnse fat döt le poscibl por aumentè l’atrativité dles scores altes tles valades ladines, dantadöt por ti pormët ai studënć n’oferta de formaziun locala y che tëgn cunt dles esigënzes dl grup linguistich ladin“, insciö l’assessur Florian Mussner che à sotrissè le bun funzionamënt dles scores altes ladines che vëgn desmostrè dal aumënt dles iscriziuns ti ultims agn. „Inće sce les iscriziuns ti ultims 9 agn é passades da 288 tl ann de scora 2005/06 a 549 tl ann 2014/15 cun n aumënt dl 90 porcënt é la soma minima a livel provinzial por öna na direziun tl plan teritorial scolastich de 300 iscriziuns“, insciö l’assessur Mussner.
La delibraziun sön le plan teritorial dles scores altes ladines é gnüda aprovada da pert dla Junta provinziala do l’arat positif dla Seziun ladina dl Consëi scolastich y do l’aldiziun dl'Assemblea di ombolć dles valades ladines.
rc
