Atualità
L’Euregio online: La personalité, le post y le tema dl mëis
Les fondamëntes iuridiches por na colaboraziun dles universitês dl’Euregio Südtirol-Trentin-Tirol, la sënta baroca dl Consëi provinzial dl Tirol y la direturia artistica austriaca Irene Girkinger: chisc é i temesc dl mëis che an po lì do sön la homepage dl’Euregio sot ala misciun www.europaregion.info.
Vigni mëis él l’Euregio che presentëia sön süa plata web na personalité, n lüch y na chestiun iuridica atuala che reverda öna o plü dles trëi provinzies dl Südtirol, dl Trentin y dl Tirol. La porsona che vëgn presentada por le mëis de forà é la direturia artistica Irene Girkinger, che laôra da döes sajuns por les Vereinigten Bühnen Bozen cun l’intenziun da anuzé la cultura sciöche punt de coliamënt danter i lingać desfarënć presënć tl’Euroregiun. Do le moto „la cultura ne conësc degügn confins“ s’anuzëia Girkinger dles comunanzes culturales por costruì na rëi de mediaziun transfrontaliera. Le retrat dla direturia artistica é da ciafè tlican sön:www.europaregion.info/it/irene-girkinger.asp
La tematica iuridica dl'Euregio reverda chësc iade les fondamëntes iuridiches por la colaboraziun futura danter les universitês dl Südtirol, dl Tirol y dl Trentin. La presidënta dl’Assoziaziun de dërt publich comparè y de dërt a livel europeich Anna Gamper nes presentëia la basa iuridica cun chëra che la colaboraziun gnarà ampliada ti proscims mëisc. L’intervista é da odëi tlican sön: www.europaregion.info/it/rechtliche-moeglichkeiten-universitaerer-zusammenarbeit-teil-2.asp
Sciöche lüch dl mëis él gnü chirì fora la sënta dl Consëi provinzial dl Tirol tl zënter de Desproch. Le Consëi provinzial é le organn de legislaziun dl Land Tirol, les lites por le Consëi vëgn tignides vigni cinch agn y le numer di aconsiadus é de indöt 36. Dlungia la poscibilité por i zitadins da podëi ascutè sö en direta les sentades dl Consëi provinzial ti vëgnel inće pité l'ocajiun da vijité la costruziun baroca costruida dal 1725 al1728 tl zënter de Desproch cun na vijita acompagnada aldinfora di orars preodüs por les sentades. Le team dl’Euregio à metü adöm n video de presentaziun dla sënta dl Consëi da odëi sön: www.europaregion.info/it/tiroler-landtag.asp
rc
