Atualità
Corvara: Le biotop de Braia Frëida romagn sconè
Le lech artifizial nü che é preodü por l’inevamënt dles pistes da schì tla localité de Braia Frëida a Corvara po gnì fat sö mo messarà gnì smendrì por un en terzo por garantì la sconanza dl biotop tles vijinanzes. Chësta dezijiun é gnüda tuta dala Junta provinziala te süa sentada edemala sön proposta dl’assessur por l’ambiënt Richard Theiner.
„Do valgönes incuntades y consultaziuns cun i gesturs di implanć y cun i ofizi provinziai competënć – insciö l’assessur Richard Theiner – ùnse arjunt n bun compromis che tëgn cunt sides dles ghiranzes di gesturs di implanć por l’inevamënt dles pistes, co dles diretives por la sconanza dl ambiënt y dl paesaje dl biotop de Braia Frëida.“
La delibraziun aprovada dala Junta provinziala en mertesc ai 27 de jenà prevëiga insciö la reduziun de un en terzo dla spersa dl lech artifizial preodü tla localité Braia Frëida a Corvara, por podëi garantì la sconanza dl'ecologia dl biotop. De conseguënza gnaral inće smendrì la spersa dl material da to demez da 80.000 metri cubic a zirca 40.000 metri cubic. „A chësta manira saral poscibl da porté döt le material tla deponia Col Alt zënza degun dann ecologich por les zones sensibles y sot a proteziun.“
rc
