Atualità
Ejam de maduranza: Les materies dla secunda proa scrita é stabilides
Le Miur (Ministero Istruzione Università e Ricerca) á publiché les materies dla secunda proa scrita dl ejam de stat 2014-15 y les materies che ti vëgn assegnades ai comissars esterns dla comisciun. Inće por les scores altes ladines él gnü publiché les materies dla secunda proa scrita.
Por la Provinzia da Balsan vëgn les materies dessura definides, aladô dl statut de autonomia, dal MIUR sön proposta dles 3 Intendënzes. Insciö él gnü publiché da pert dl Intendënt dr. Roland Verra inće les materies che reverda les scores altes ladines, por l’ann de scora 2014-15 (la tabela cun les materies dla secunda proa scrita por les scores altes ladines é gnüda injuntada).
I ejams de Stat dles scores altes mët man ai 17 de jügn 2015 y se ruvarà ca. anter i 10 de messè. Por l’ejam de Stat tles scores altes ladines vëgnel istituì 3 comisciuns, vignöna formada da n presidënt (de regola n diretur o na direturia de n atra scora), da 3 insegnanć interns y da 3 insegnanć che vëgn da n atra scora alta.
Pro la pröma proa scrita pò i candidać dles scores ladines chirì fora sce ai ô scrì le tema por talian o por todësch. La secunda proa scrita reverda na materia caraterisënta de chëra scora y à le fin da valuté les conoscënzes speziches dl studënt y dla studënta. Por chësta proa scrita à le MIUR dè fora por chësc ann n valgönes indicaziuns nöies respet ai atri agn – mudaziuns che ti gnarà spligades plö avisa ai studënć y ales studëntes. La terza proa scrita é partida sö te döes pertes y te dui dis. Le pröm dé vëgnel scrit n tema te chël lingaz che ne é nia gnü adorè pro la pröma proa scrita. Le secundo dé respogn i candidać a na ligna de domandes che reverda 4 o 5 materies. L’ejam de stat se stlüj jö cun la proa a usc che tol ite dötes les materies de chël ann de scora.
I studënć y les studëntes che fajarà chësc ann de scora l’ejam de maduranza sarà i pröms che á frecuentè la scora alta aladô dla reforma dl ann 2010.
usp
