Atualità
Le Meteo de jenà: Temperatöres tröp sura le valur mesan
Dal punt de odüda tlimatich él gnü registré te Südtirol tl mëis de jenà temperatöres danter 2 ćina 2,5 degrà sura le valur mesan. Al é stè insciö le mëis de jenà cun les temperatöres plü altes di ultims 8 agn. I dać dl meteo local vëgn metüs a desposiziun dal Sorvisc Meteo dla Provinzia.
La temperatöra plü alta dl mëis de jenà é gnüda registrada ai 10.01 tla Val Venosta, olache al é gnü arjunt na temperatöra de 21 degrà a Laces sciöche conseguënza dl föhn che é gnü dal nord. I 21 degrà é inće stà le valur plü alt mai registré te jenà tl Südtirol. Por ći che reverda les prezipitaziuns él tomè de jenà na cuantité de plöia y de nëi sura le valur mesan plurianual de 50 ćina a 80 porcënt. Incö (30 de jenà) al novü por le secundo iade te chësc invern tles basses dles valades cun söporjö 10 zentimetri de nëi frësca.
Le Sorvisc meteo dla Provinzia à implü registré ai 10 de jenà le fenomenn tlimatich dles neores „iridescëntes“, che é n resultat dl’inzidënza di rais dl sorëdl cun cristai de dlacia dër pici o gotes d’ega dër piceres. Les previjiuns por le mëteman dl mëis de forà prevëiga, do i meteorologs provinziai, tëmp variabl y da nio cun temperatöres da d’invern. Por le momënt ne él preodü degönes novüdes.
rc
