Atualità
Dala Junta: Conzesciun dla zentrala de S.Antone-Zënter de Musiga dl’Euregio
La Junta provinziala à anulè incö (03 de forà) la conzesciun che ti é gnüda assegnada ala SEL tl 2009 por l’implant idroeletrich de Sant Antone a Balsan. La conzesciun ti gnarà assegnada ala Eisackwerk srl. La Junta provinziala à implü aprovè l’elaboraziun de n proiet por la realisaziun de n Zënter de Musiga dl’Euregio tl Grand Hotel de Toblach.
La Junta provinziala à anulè incö, mertesc ai 3 de forà, la conzesciun che ti é gnüda assegnada tl 2009 ala SEL Spa por la gestiun dl implant idroeletrich de Sant Antone a Balsan. La conzesciun por i proscims trënt agn ti gnarà insciö reconesciüda ala Eisackwerk Srl, che â presentè do l’arat di ofizi competënć tl 2009 la miù proposta, inće sce la Junta ti â daldô assegnè la conzesciun ala SEL. „Cun la deliberaziun da incö él la Junta provinziala che fej n ater vare important por restabilì la legalité y por garantì la segurëza iuridica tl setur dl’energia tl Südtirol“, insciö le presidënt dla Provinzia Arno Kompatscher do la sentada dla Junta incö (03/02) a Balsan. L’Eisackwerk Srl da süa pert renunziëia ai recursc y ales domandes do na retüda finanziara dl dann stimè de 480 miliuns de euro tl confrunt dla SEL Spa y dla Provinzia.
„Cun la renunzia dl Eisackwerk Srl él gnü evité n gran dann finanziar por i contribuënć. Adöm ala fujiun danter SEL Spa y AEW Spa é chësta dezijiun n vare important por le scomenciamënt de n’impostaziun nöia dla politica dl’energia südtiroleja“, à splighé incö l’assessur competënt Richard Theiner y à injunté: „Do les chestiuns iudiziaries podunse śëgn finalmënter laurè sön les tematiches importantes che reverda la popolaziun südtiroleja: la segurëza dl refornimënt energetich, la cualité di sorvisc y n sistem dles tarifes nü.“
La Junta provinziala à implü aprovè incö (03/02) la proposta dl assessur por la cultura todëscia Philipp Achammer da svilupé n proiet de coordinamënt cultural por trasformè le Grand Hotel de Toblach te n Zënter de Musiga dl’Euregio. L’elaboraziun dl proiet é basè sön l’acordanza cultura dl GECT (Grup europeich de cooperaziun teritoriala) dl’Euregio che prevëiga la poscibilité da formè istituziuns culturales de ezelënza por promöie la cultura y musiga dl’Euregio. L’obietif dl proiet de m zënter de musiga tl Grand Hotel a Toblach é chël da ti ofrì a dötes les assoziaziuns y organisaziuns musicales, ai studënć, a grups musicai y ales orchestres de jogn da döta l’Euregio na strotöra de ajornamënt y de formaziun musicala d’ezelënza. La Junta ti à dè insciö l’inćiaria al assessur Philipp Achammer da laurè fora tl 2015 n conzet por la realisaziun dl Zënter de Musiga adöm ales repartiziuns competëntes dl’Euregio, dl Tirol y dl Trentin y adöm ales scores de musiga, ales organisaziuns y assoziaziuns musicales dles trëi provinzies.
rc
