Atualità
Proteziun dales lovines: Training por salvè i compagns
Le numer di morć por gaujia de lovines é jü sö chësc ann tles Alpes. Inće tl Südtirol él gnü registré plü situaziuns de prigo y emergënza por gaujia de lovines tles edemes passades. Por sensibilisé y informè sön le dërt comportamënt da avëi tl caje de lovines él la Provinzia che sostëgn sis camps d’eserzitaziun ARTVA (debann) te sis raiuns dai schi.
I 15 menüć atira do che na lovina é gnüda jö é de importanza fondamentala por le suravire de na porsona che é rovada sot ala lovina. Le dërt comportamënt dles scuadres de socurs y dles porsones che é söl post alza cotan les poscibilitês dles porsones sot ala lovina da suravire y cun l’aumënt costant dl interès por i schi da alpinism, él inće les atrezatöres nezesciares por chësc sport che aumentëia.
Mo inće sce les tecnologies modernes pita n aiüt concret te situaziuns de prigo, ôl inće ester na formaziun nezesciara por l’adoranza dles atrezadöres (piepser, badì, stromënć de chirida eletronics). Propi cun chësc fin él gnü metü sö te sis raiuns dai schi dl Südtirol, cun l’aiüt finanziar dla Provinzia de Balsan y cun l’aiüt logistich di gesturs di implanć, sis camps d’alenamënt (sön na spersa de 80 por 80 metri cuadrać y n’altëza danter 1900 ćina 2800 metri) cun eserzizi de simulaziun de lovines por porvè fora le funzionamënt dl’atrezatöra y por planifiché les mosöres de socurs.
I sis camps ti pîta a düć i interessà la poscibilité da recostruì avisa na situaziun teorica de emergënza do la tomada de na lovina por alenè le comportamënt da adorè te chëstes situaziuns. Implü vëgnel inće pité cursc d’orientamënt cun mosöres de pröm aiüt y de chirida de porsones sopolides sot a lovines.
Un di stromënć plü efiziënć é te chësc vers l’ARTVA (stromënt de chirida de porsones rovades sot a na lovina), che pormët ales scuadres de socurs da chirì y localisé na porsona. I camps d’alenamënt é da ciafè söl Piz Sela, tl raiun dai schi dles Dolomites dl Sest, sön la Plose, a Ladurns, Pfleders y Solda. La partezipaziun ai cursc é debann y al vëgn inće metü a desposiziun por i interessà l’atrezatöra nezesciara por i eserzizi. Por plü informaziuns pon vijité la plata internet dl proiet www.sicherheitamberg.bz.it/, na scomenciadia che vëgn co-finanziada dal’Uniun Europeica tres le program Interreg Talia-Svizra.
rc
