Atualità
Danter continuité y inovaziun: le dagnì dl Museion
N statut nü, n consëi dla fondaziun smendrì, na presidënza renforzada cun la orentè da orëi dialoghè y se confrontè: insciö dess le „Museum por l’ert moderna y contemporanea – Museion“ renforzè y amplié süa funziun culturala y soziala tl monn dla cultura y dl’ert tl Südtirol. L’assessur por la cultura Philipp Achammer à presentè incö ( 5 de forà) les novitês.
Les diretives futures dla politica cultura dl Museion é gnüdes presentades incö (05/02) te na conferënza stampa dal assessur por la cultura todëscia Philipp Achammer a Balsan. L'assessur s’aspeta na daurida dal Museion y „n consolidamënt plü sterch cun le teritore cun la creaziun de impulsc, mo inće iritaziuns, por le svilup de nosta sozieté.“ Süa ghiranza é chëra de n dialogh "costant y critich, che porta früć, che prô da tò ite döta la sozieté y nia ma les porsones che se dà jö cun l’ert y la cultura dl Südtirol.“ Sciöche öna dles sfidades plü granes dl dagnì à l’assessur nominé le raport cun y la trascmisciun dl ert moderna: „Al ne po nia ester che an mëss avëi tëma da ne capì nia! Le Museion dess ester na ćiasa por düć i abitanć dl Südtirol.“
Incö él inće gnü presentè tratan la conferënza stampa le statut atualisé dl Museion, che prevëiga danter l’ater le smendrimënt a set aconsiadus tl consëi dla fondaziun y a na perioda plü cörta dla dorada dl inćiaria dl consëi de ma plü trëi agn. Cater rapresentanć dl consëi dla fondaziun é gnü nominà dala Junta provinziala chëst’edema: „La presidënta atuala Marion Piffer y le diretur dla Repartiziun Cultura Antonio Lampis sarà dui di aconsiadus nüs, cun chi che i ùn orü garantì inant continuité. Dales nominaziuns nöies dl architët Walter Angones y dla suranstanta dla Cooperativa Soziala dl EOS Barbara Pizzinini se aspetunse indere impulsc y propostes nöies“, insciö Achammer. L’assoziaziun dl Museion à nominé da süa pert le presidënt dl’Organisaziun Export Südtirol EOS Federico Giudiceandrea y Hanspeter Hager, un di co-fondadus y mëmber plurianual dla Fondaziun. Implü gnaràl laprò le comerziant Hans Peter Haselsteiner che é gnü nominé dala Junta adöm al’assoziaziun dl Museion. Le compit prinzipal dl consëi de fondaziun é chël da stabilì la ligna prinzipala dla politica culturala dl Museion, da sostignì le conzet dles mostres y dles racoiüdes y da valuté y aprovè le budget anual.
L’assessur Philipp Achammer s’à inće detlarè por n model de partezipaziun publich-privat. „Na forma de sostëgn y finanziamënt danter publich y privat é n model de suzés por le dagnì, dantadöt tl ćiamp dl ert moderna y contemporana, mo cun la definiziun de regoles tleres“, insciö Achammer. N vare important te chësc vers é gnü fat dala Junta tl’ultima sentada: Ara à aprovè les premisses por na partezipaziun de privać ala fondaziun mo à stabilì tl medemo momënt regoles tleres che reverda conflić d’interés y incompatibilitês.
N bilanz cun les tapes plü importantes – dal scomenciamënt dl Museion y les prömes mostres tl vedl ospedal da Balsan, ala fondaziun dl consëi ćina ala costuziun dla strotöra nöia, ai problems finanziars y al scandal dl arosch – é gnü presentè dala presidënta atuala Marion Piffer Damiani. Le Museion é stè bun ti ultims cater agn da aumentè dl 40 porcënt i vijitadus cun n valur mesan atualmënter de 50.000 vijitadus anuai.
rc
Galaria dales fotografies
