Atualità
Sostëgn por les families, domandes por n contribut ćina ai 28 de forà
Organisaziuns che laôra por le bëgn dles families, les umes dl dé, zëntri por mituns y families sciöche inće comuns y corporaziuns privates che pîta sorvisc por families cun pići mituns po dè jö les domandes do contribuć por ativitês ordinares, proieć y investimënć ćina ai 28 de forà dl 2015 pro l’Agenzia Familia.
Le sostëgn por i ënć publics y les organisaziuns privates che laôra zënza intenziuns de davagn por le bëgn dles families vëgn garantì dala Provinzia de Südtirol tres l’atuaziun dla lege provinziala nr. 8 dl 17 de merz dl 2013 „Svilup y sostëgn dla familia tl Südtirol“. Do la lege vëgnel conzedü contribuć por ativitês ordinares, proieć y investimënć tl cheder dl'ativité por la formaziun dla familia. Les diretives por ciafè n finanziamënt é gnüdes formulades danü de novëmber dl ann passè.
Ćina la fin dl mëis de forà él insciö poscibl da dè jö na domanda por contribuć por assoziaziuns y corporaziuns che pîta sorvisc por n sostëgn preventif y de formaziun dles families, che sostëgn l'informaziun y le confrunt bunorì cun tematiches sön la familia y la vita de pêr, i programs de formaziun por la familia y i geniturs y l’auto-aiüt familiar. Al vëgn dantadöt sostignì i punć de incuntada y les atres lercs por les families, i zentri por les families, i zentri geniturs-mituns y d'atres formes de barat che raforzëia le raport danter geniturs, geniturs y mituns, danter generaziuns y la partezipaziun ativa dla figöra paterna. Implü vëgnel sostignì aziuns che promöi le mioramënt dla compatibilité danter le laûr y la familia, programs che favorësc l’avalianza di sesc, l'assistënza y l’acompagnamënt che reverda scomenciadies di geniturs, i grups de jüch, i zentri geniturs-mituns y l’inrescida sön la familia.
Te valgügn ćiamps él la man publica che garantësc implü contribuć por proieć o investimënć. Inće chilò él da tignì ite la data dl 28 de forà por presentè domandes do sovenziuns.
Düć i terminns y na descriziun detaiada les modalitês nezesciares por fà domanda pon lì do tla Rëi zivica sot a:
Contribuć por l’ativité ordinara: http://www.provinzia.bz.it/la/sorvisc/sorvisc-categories.asp?bnsvf_svid=1009820
Contribuć por investimënć: http://www.provinzia.bz.it/la/sorvisc/sorvisc-categories.asp?bnsvf_svid=1009880
Contribuć por proieć: http://www.provinzia.bz.it/la/sorvisc/sorvisc-categories.asp?bnsvf_svid=1009840
rc
