Atualità
Avalianza dles oportunitês: Premiaziun de trëi inrescides söl tema
Andrea Urthaler, Elisa Oberhammer y Julia Ganterer à inom les trëi ëres che é gnüdes premiades incö (06/02) por sü laûrs d’inrescida sön tematiches che reverda l’avalianza dles oportunitês tla sozieté dl Südtirol. Les trëi davagnadësses s’à dè jö cun tematiches che reverda la nasciüda dl movimënt por les ëres tl Südtirol, les costruziuns soziales di sesc y la perzeziun individuala dl dolur.
Andrea Urthaler à davagné le pröm post dl concurs scrit fora dala Consulta por l’avalianza dles oportunitês adöm al Ofize Ëres cun so laûr "Die neue Frauenbewegung in Südtirol. Von den Anfängen bis zur Einführung des Beirates für Chancengleichheit“ che trata le movimënt por les ëres tl Südtirol dala nasciüda ćina al’istituziun dla Consulta por l’avalianza dles oportunitês. Le laûr de Urthaler contëgn n’analisa detaiada che mostra sö le contribut dles ëres por le svilup dla sozieté tl Südtirol, à laldè Edith Ploner dla comisciun te süa laudatio. Le pröm pest à na dotaziun de 3.000 euro.
Le secundo pest (2.500 euro) é jü a Julia Ganterer che à stlüt jö so percurs academich tl'Université da Desproch cun le stüde „Habitus – Moral – Sozialer Zwang. Der Prozess des Ver- und Erkennens durch die doxische Verschleierung der Geschlechterverhältnisse“. Te süa inrescida à Ganterer analisé la relaziun danter les strotöres dla sozieté y les desfarënzies de perzeziun dla forza danter i sesc. Süa contlujiun é chëra che les desfarënzies ne é nia le resultat dl ponsé dles porsones singules mo n resultat basè sön costruziuns soziales. La laudatio é gnüda presentada da Helga Innerhofer.
Elisa Oberhammer à stlüt jö so percurs de formaziun academica tl’Université da Verona cun le stüde "Der postoperative minimalinvasive gynäkologische Schmerz: Schmerzintensität- und Wahrnehmung der Sprachgruppen in Südtirol" cun chël che ara à ciafè surandè le terzo post (dotaziun de 2.000 euro). Te so stüde à Oberhammer fat n’analisa tl ospedal a Bornech che reverda l’intensité y la perzeziun dl dolur dles ëres do intervënć d’operaziun.
L’assessuria provinziala Martha Stocker à recordè te so discurs che por merit dles inrescides scientifiches à les trëi candidates contribuì a aumentè les conescënzes sön les tematiches analisades cun la definiziun de propostes de soluziuns. La presidënta dla Consulta provinziala por l’avalianza dles oportunitês Ulrike Oberhammer à recordè che inće sce l’avalianza dles oportunitês é preodüda dala lege restel ćiamò tröp da fà te chësta direziun, dantadöt tl setur dl laûr.
Ala premiaziun àl implü tut pert l’assessuria por les families Waltraud Deeg, l’aconsiadëssa provinziala Brigitte Foppa, le diretur de Repartiziun Helmuth Sinn y l’aconsiadëssa por l’avalianza dles oportunitês Michela Morandini.
Düć chi che ô to pert al proscim concurs po dè jö sü laûrs de laurea, de master, de dotorat y d’inrescida ćina ai 2 de merz dl 2015 tl Ofize Ëres, strada Dante 11 a Balsan. Al vëgn tut en conscidraziun laûrs che analisëia la situaziun dl’ëra tla sozieté o che tematisëia l’avalianza y la relaziun di sesc. Por informaziuns plü menüdes y por la bandida dl concurs pon s’informè sön le sit dla Consulta por l’avalianza dles oportunitês: http://www.provinz.bz.it/chancengleichheit/default.asp.
rc
Galaria dales fotografies
