Atualità
Le Museum Natöra dl Südtirol é rové a 1 en miliun de vijitadus
1 en miliun de entrades: Chësc é le numer dles porsones che à vijité le Museum Natöra a Balsan dal mëteman de süa ativité d'esposiziun dal 2000 inant. La familia Hager de Balsan à albü la fortüna de ester avisa le milionejim vijitadù dl Museum y à ciafè inier (12/02) les congratulaziuns dal assessur Florian Mussner, dal diretur de Departimënt Valentino Pagani y dal diretur dl Museum Vito Zingerle.
Un en miliun de vijitadus: Chësc numer simbolich à arjunt inier, jöbia ai 12 de forà dl 2015, le Museum Natöra dl Südtirol a Balsan dal mëteman dl ativité de esposiziuns davertes al publich dal ann 2000 inant. La familia Hager da Balsan à albü la fortüna da „timbré“ la chërta numer un en miliun y à ciafè surandè por chësta ocajiun na picera scincunda – na Museumcard por döta la familia y dui libri che ilustrëia la storia di museums dl Südtirol – y i salüć da pert dl assessur por i Museums Florian Mussner, dl diretur de Departimënt por i Musems y Bëgns culturals Valentino Pagani y dl diretur dl Museum Natöra Vito Zingerle.
Le pere dla familia Hager à sotligné tratan l’incuntada la gran valüta che le Museum Natöra à dantadöt por la jënt dl post: „Le Museum dles Sciënzes naturales tl Südtirol ne valorisëia cun süa presënza nia ma le cuartier, mo al s'à svilupé cul tëmp te n post de racoiüda por döta la cité da Balsan y la jënt dl post. Dër interessant é do mi punt d’odüda la forma de comunicaziun di contignüs dl Museum che é bun da trasmënt tematiches che reverda la natöra te na forma azessibla a düć y ti trasmët insciö al publich nia ma informaziuns, mo inće emoziuns.“
L’assessur Florian Mussner à sotligné l’importanza dl Museum por döta la popolaziun dl Südtirol: „Söporjö le 70 porcënt di vijitadus dl Museum dles Sciënzes Naturales dl Südtirol fej pert dla popolaziun dl Südtirol, y le 50 porcënt de chisc é mituns y jogn. Chësc ô dì che le Museum s’à confermè tl tëmp sciöche n’oferta de formaziun locala che vëgn dër aprijiada y che sües propostes vëgn anuzades da dötes les generaziuns.“
La picera davagnadëssa dla familia Hager à dër aprijé tratan süa vijita le gran acuarium, la seziun dedicata ala laûrs M14 dal inom „Arkas“, i tiers vis (i pësc y les bisches) y le formià dl Museum. En general é inće les mostres speziales dër aprijiades dai vijitadus, sides gragn co pici, y che é dedicades danter l’ater a tematiches che reverda la natöra y che taca adöm cun la realté alpina y la biodiversité tl raiun dles Alpes.
Informaziuns plü monüdes pon ciafè tl Museum dles Sciënzes Naturales dl Südtirol, strada Bottai 1, Balsan, tel. 0471 412964, web http://www.naturmuseum.it/rm/default.asp
I museums dl Südtirol pon ciafè online sön www.musei-altoadige.it
rc
