Atualità
Trëi agn de Südtirol Pass – Ass. Mussner: I vantaji vëgn aprijà da düć
Prësc indöt 133.000 anuzadus atifs, n aumënt sostanzial dles porsones che anüza le trasport publich y funziuns d’adoranza nöies: Chësc é le bilanz de morvëia dl Südtirol Pass da süa ativaziun dai 14 de forà dl 2012. „La cherta unica por i mesi dl trasport publich por döta la Provinzia à motivé tröpes porsones da anuzé tres deplü les ferates y corieres publiches“, à sotligné l’assessur Mussner.
Indöt 132.831 chertes dl Südtirol Pass é atives atualmënter, de chëstes nen funzionëiel indöt 88.809 cun n tarif standard y 44.022 vëgn adorades cun n tarif plü a bun prîsc por families. Dui terzi di Südtirol Pass vëgn ćiariades dai anuzadus instësc (chërtes prepaid), les atres chertes funzionëia tres n coliamënt diret cun le cunt te banca (postpaid). „Le numer di anuzadus dl Südtirol Pass cun la tarifa standard é aumentè dl 50 % ti ultims trëi agn“, sotlignëia l’assessur por la mobilité Florian Mussner. Indöt él gnü scrit fora ćina śëgn 182.705 chertes: pro chësc numer de stampes él inće da cumpedè laprò i duplicać y les chertes nia anuzades. Implü él gnü fat domanda do 6.519 chertes „free“ por porsones cun n’invalidité da 74 % insö. „Sce i aratun laprò i abonamënć por studënć, scolars y i seniors spo rovunse sön almanco le 50 % dla popolaziun dl Südtirol che à n abonamënt por le trasport publich“, insciö l’assessur Mussner.
Che le sistem dl Südtirol Pass funzionëia vëgn inće desmostrè dal aumënt dles porsones che s’anüza dl trasport publich: ma tl ann 2014 é le numer dles timbradöres rové a 51,8 miliuns, n aumënt de 2,6 miliuns dal ann da denant. „I vantaji vëgn oramai aprovà da düć y le sistem dl Südtirol Pass é inće n model che vëgn studié tles regiuns te nostes vijinanzes“, à sotligné l’assessur.
Cun le Südtirol Pass da Desporch ćina a Lienz
Öna dles gran sauridanzes dl Südtirol Pass é te chësc contest le bun funzionamënt dl abonamënt sön les trates transfrontalieres che porta ćina Desporch y Lienz: le tarif por la trata austriaca vëgn registré diretamënter cun la timbradöra tles staziuns. Implü él gnü laprò la poscibilité da registré la cherta vantaji dla ÖBB tres le cunt dl Südtirol Pass cun le vantaje che al vëgn calcolè automaticamënter le prîsc a miù marćé por les trates tl’Austria.
My Pass: N’app nöia por i anuzadus dl Südtirol Pass
I possessurs dl Südtirol Pass po inće s’anuzé dl’aplicaziun por android „My Pass“, cun chëra che al é poscibl da odëi düć i dać personai che reverda le Südtirol Pass, dai chilometri fać, al plann tarifar, ales timbradöres efetuades, i mesi de trasport anuzà, yii.
Les atres funziuns
Inće i iadi cun les corieres dl Nightliner po gnì paiades diretamënter cun le Südtirol Pass. Le Südtirol Pass é inće un di partners por le proiet Carsharing, olache al po gnì anuzé sciöche „passepartout“ por l’azés ai auti d’imprëst. Implü saràl tosc inće poscibl da adorè le Südtirol Pass por les cassëtes cun les rodes tles staziuns dles ferates.
Da setëmber inant cun plann tarifar nü
La Junta provinziala à aprové da püch na mudaziun dl plann tarifar dl Südtirol Pass che jarà en forza al 1 de setëmber dl 2015 cun na cumpedada nöia dles series di chilometri y cun n aumënt di tarifs tles prömes series. „Nosta intenziun é stada chëra che l’adatamënt dl plann tarifar ne ais – fajon na calcolaziun sön l’adoranza anuala - degun influs sön i pendolars y les porsones che anüza tröp i mesi dl trasport“, spliga l’assessur Florian Mussner. Paié de plü messarà dantadöt les porsones che adora datrai i mesi dl trasport publich sön piceres trates. „La reforma dl sistam tarifar se basëia inće sön les regolamentaziuns dl’UE y dl Stat che prevëiga na curida dles spëises dl trasport publich de almanco 35 porcënt“, insciö l’assessur por la mobilité.
Por blochè o ativé le Südtirol Pass, por damanè do n duplicat o atres informaziuns prëibel cherdè sö le numer de telefonn 840 000 426 tratan i orars d’ofize.
rc
Galaria dales fotografies
