Atualità
I dërć dla porsona y l'integraziun tl Südtirol: Aziun de sensibilisaziun
“I dërć dla porsona y l'integraziun tl Südtirol”: chësc é le tema dla campagna de sensibilisaziun nöia che mët man incö por un n mëis y che é gnüda laorada fora dal Sorvisc provinzial de coordinamënt por l’integraziun (KOI). Cun placać de sensibilisaziun ti comuns dl Südtriol ôn insciö motivé da ponsè do sön la proteziun di dërć umanns de vigni porsona y dles sfidades che reverda l'integraziun.
Por en mëis intier– dal 16 de forà ai 16 de merz – saràl da odëi te de plü comuns dl Südtirol placać cun pinsiers tuć fora dala Detlaraziun Ofiziala di Dërć dles Porsones, la detlaraziun storica dles Naziuns Unides (ONU) dl 1948 y un di documënć plü significatifs por ći che reverda i dërć dles porsones. Tres la realisaziun de placać tematics che revera i articui dla Detlaraziun ô le Sorvisc provinzial de coordinamët por l’integraziun (KOI) porvè da atiré l’atenziun dla popolaziun sön i dërć dla porsona y dla tematica dl'integraziun. L'aziun de sensibilisaziun à sciöche obietif chël da informè sön les situaziuns de vita de nostes conzitadines nöies y de nüsc conzitadins nüs che é gonot caraterisada da desgrazies, da vera, da persecuziun y da manćianza de respet por la dignité dla porsona y che la gaujia de süa presënza tl Südtirol é gonot na conseguënza sforzada dala situaziun de vita te sü Paîsc Nadè.
Cun l'aziun de sensibilisaziun “I dërć dla porsona y l'integraziun tl Südtirol” él le Departimënt dla Cultura todëscia y Integraziun cun a cé l'assessur Philipp Achammer che ô sensibilisé la popolaziun südtiroleja y la fà ponsè do sön la tematica di dërć dla porsona y sön la chestiun dl'integraziun.
La Detlaraziun di dërć dla porsona à 30 articui che contëgn la proteziun fondamentala di dërć che vigni individuum dess avëi, zënza desfarënzies dl corù dla pel, ses, lingaz, religiun, convinziuns politiches o de atres sorts, provegnënza nationala o soziala, patrimone y nasciüda, belanfat ći condiziun legala che ara à tl paîsc olache ara vir. La valüta dla dignité y dl valur dla porsona y di medemi dërć por i ëi y les ëres, sciöche inće la valüta dla liberté, dla iustizia y dla pêsc dl monn é les fondamëntes de chësta detlaraziun dles Naziuns Unides sön la promoziun y proteziun di prinzips universai di dërć dles porsones.
L’intenziun dl sorvisc de coordinamënt por l’integraziun cun chësta scomenciadia é chëra da portè la popolaziun a ponsè sura, a se dè jö y sintì te na manira plü responsabla la tematica di dërć dles porsones. „Nosc compit é chël da ti garantì a dötes les porsones che vir chilò da nos na vita cun dignité y de liberté, inće a chëres porsones che à messü lascé süa patria por gaujes de vera, de persecuziuns, de discriminaziuns y de meseria“, à sotligné la direturia de departimënt Vera Nicolussi-Leck.
rc
