Atualità
Fujiun SEL/AEW: en sabeda ai 21 sentada straordinara dla Junta
La fujiun danter SEL y AEW, i dui operadus locai tl setur dl’energia, é oramai rovada al punt da gnì stlüta jö. En sabeda danmisdé (21/02) s’incutarà la Junta provinziala te na sentada straordinara por deliberé sön l’acordanza y dales 10 gnaràl spo sotescrit ofizialmënter dal presidënt dla Provinzia Arno Kompatscher, dai ombolć de Balsan y Maran y dai presidënć de SEL y AEW le contrat de fujiun.
Le percurs de reorganisaziun tl setur energetich tl Südtirol à metü man söporjö dan da n ann, y do mëisc de tratatives complicades y lungies eson rovà ala contlujiun dl prozès. La fujiun danter la sozieté energetica provinziala SEL y le grup AEW de proprieté di Comuns de Balsan y Maran é oramai deventada na realté concreta. Le ultim vare por la nasciüda de na sozieté publica unica y renforzada sön le marćé dl’energia gnarà fat en sabeda ai 21 de forà. La Junta provinziala s’incuntarà danmisdé por na sentada straordinara por deliberé sön l’acordanza cheder sön la reforma de gestiun dl setur energetich. Daldô él preodü la sotescriziun da pert dl presidënt dla Provinzia Arno Kompatscher, acompagnè dal assessur Richard Theiner, dl contrat de fujiun danter SEL y AEW adöm cun i ombolć de Balsan y Maran, Luigi Spagnolli y Günther Januth, y cun i presidënć de SEL, Wolfram Sparber y de AEW, Mauro Marchi, tl cheder de na conferënza stampa en
sabeda ai 21 forà 2015
dales 10
tl salf dles reuniuns dl Govern provinzial
tla secunda alzada de Palaz Widmann
plaza Silvius Magnago 1,
a Balsan.
rc
