Atualità
Aziënda sanitara, 22 candidać por la direziun generala
Inier (mertesc ai 17 de forà) él tomè le terminn por presentè les candidatöres por la posiziun dl diretur general nü dl’Aziënda sanitara. „Indöt – insciö l’assessuria por la sanité Martha Stocker – él rové ite 22 domandes che gnarà śëgn ejaminades dala comisciun tecnica.“
Do les dimisciuns de Andreas Fabi dal rode de diretur general dl’Aziënda sanitara dl Südtirol à la Junta provinziala publiché na bandida de concurs por la sostituziun cun la tomada por la presentaziun dles domandes ćina inier, mertesc ai 17 de forà.
„La prozedöra s’é stlüta jö cun 22 candidać“, comentëia l’assessuria Martha Stocker y injuntëia che le proscim vare sarà chël da valuté sce vigni candidatöra corespogn ales condiziuns por la partezipaziun al concurs da pert di candidać.
„Do la prozedöra d’ejaminaziun metaral man le laûr de valutaziun y seleziun dla comisciun tecnica che gnarà nominada proscimamënter“, insciö l’assessuria Stocker che recorda che „na prozedöra de seleziun trasparënta por le diretur general nü é öna dles fondamëntes por l’atuaziun dla reforma sanitara tl dagnì.“
rc
