Atualità
Pendolars: Vigni dé mesamënter 11 chilometri söl iade por jì a laurè
N iade de 11 chilometri al dé fej i impiegać dependënć dl Südtirol mesamënter por jì a laurè. Tl’ediziun nöia dl „Arbeitsmarkt news“ à la Repartiziun Laûr analisé la destanza danter la residënza di pendolars lauranć y le post de laûr.
Sce an tôl en conscidraziun le tru plü cört dla rëi dl trafich por jì sön le post de laûr spo é la destanza ala fin dl ann 2014 (perioda canche l’analisa é gnüda fata) mesamënter de 11,1 chilometri. Chësc numer é le resultat de na seria de zifres y statisiches dër desfarëntes öna dal’atra che mët adöm les situaziuns de grups desvalis de lauranć. Insciö variëia la destanza aladô dl ses, dl’eté, dla residënza, dla ativité di lauranć; pro les ëres é n fatur important inće le fat sce al se trata de n’ativité a tëmp plëgn o a mez tëmp.
N ater fatur interessant é chël che plü co dui terzi di lauranć à n percurs por rové sön le post de laûr de manco de 10 chilometri. Insciö él 11 porcënt che ne fej gnanca un n chilometer por rové sön le post de laûr, 24 porcënt fej da un a trëi chilometri y 30 porcënt da trëi a diesc chilometri.
Passa un n terzo di lauranć– le 35 porcënt –mëss indere fà n percurs che é majer co 10 chilometri. „Les zifres nes mostra che al é tres plü porsones che laôra fora dai confins dl comun de residënza, inće sce na gran pert di südtirolej n’à nia so post de laûr diretamënter tl comun de residënza“, insciö l’assessuria por le laûr Martha Stocker.
Dantadöt lauranć plü jogn à n percurs por rové söl post de laûr plü lunch co lauranć plü inant cun l’eté. Pro i lauranć sura i 50 agn fej i ëi n percurs mesan de 11,8 chilometri por rové söl laûr, les ëres fej indere mesamënter 7,4 chilometri.
„Che i lauranć jogn à n tru da jì söl laûr plü lunch à inće da nen fà cun le fat che al ne é nia a desposiziun posć de laûr assà ti comuns de residënza, almanco nia ti seturs de laûr damanà dai jogn“, insciö le diretur dla Repartiziun Laûr Helmuth Sinn. Les proporziuns nia ecuilibrades dl’oferta de laûr complessiva y por ći che reverda inće i laûrs spezifics à sciöche conseguënza che le percurs da jì söl post de laûr variëia dër tröp da comun a comun.
rc
