Atualità
Kompatscher incunta le minister Kurz: Euregio, autonomia y macroregiun
La vijita austriaca dl presidënt Arno Kompatscher à metü man incö (19 de forà) cun n’incuntada cun le minister por i afars cun l’éster austriach Sebastian Kurz. Tratan l’incuntada él gnü tratè plü tematiches che reverda danter l’ater l’Euregio, le dagnì dl’autonomia y le svilup dla macroregiun alpina.
Le presidënt Kompatscher à sotligné incö (19 de forà) tratan la vijita al minister Kurz l’importanza di bugn raporć danter Balsan y Viena, y à inće rengrazié le govern austriach por l’atenziun che al ti dà ales tematiches südtirolejes. „Al fej dër plajëi – à sotligné le presidënt dla Provinzia – che l’Austria se crüzia tresfora dles chestiuns che reverda le Südtirol y cun ći gran impëgn che Viena sostëgn le svilup de nosc raiun.“ La funziun dl’Austria sciöche istituziun de proteziun por le Südtirol resta inant un di pilastri fondamentai dl’autonomia südtiroleja.
„Da chësc punt de odüda – à sotrissé inant le presidënt Kompatscher – ne ti vëgnel atualmënter nia dé la conscidraziun che aldiss pordërt al barat formal dles lëtres danter le premier Matteo Renzi y le presidënt dl’Austria Werner Faymann tl contest dles tratatives por le pat de garanzia. Chësta acordanza sotrissëia te na manira tlëra le prinzip indespensabl che regolamentëia i raporć danter Roma y Balsan sön la basa de tratatives nezesciares danter la Provinzia y le Stat.“ Le minister Sebastian Kurz à detlarè tratan l’incuntada da ester „contënt che le barat de notes danter Roma y Viena ais portè a na maiù segurëza y proteziun finanziara. L’Austria – à injuntè Kurz – à desmostrè da savëi ćiamò da adorè te na manira efiziënta süa funziun de proteziun por ti garantì na maiù segurëza iuridica ala Provinzia de Balsan.“
Le Presidënt Kompatscher ti à inće ilustrè al minister Kurz le laûr che é gnü scomencè cun la Convenziun por la reforma dl Statut d’autonomia, recordan che l’acordanza cun Roma sön la tlausola de proteziun scrî dant che la revijiun dl’Statut d’autonomia po ma gnì stlüta jö te na manira concordada danter les perts. „Nosta intenziun é chëra da laurè sön la revijiun te döes fases – à ajuntè Kompatscher – che reverda daimpröma dantadöt la reorganisaziun di compić y dles competënztes danter Stat, Regiun y Provinzia. Te na secunda fasa él spo preodü na discusciun al intern dla Convenziun por ći che reverda les chestiuns soziales y politiches.“ Le minister Kurz à sotligné che „chësc tru é dessigü le dërt y che al s’informarà tresfora cun n’atenziun particolara sön le svilup dl’autonomia südtiroleja.“
N’atra tematica che é gnüda debatüda tratan l’incuntada a Viena é stada chëra dla colaboraziun transfrontaliera tl contest dl GECT. „L’Euregio é na forma de colaboraziun che nes conzed da renforzè le lian cun l’Austria y l’Europa – à sotligné le Presidënt Kompatscher – y contribuësc inće al renforzamënt dl raport dles istituziuns y di zitadins che vir da öna y dal’atra pert dl Prener.“ Öna n’ocajiun concreta sarà inće la recordanza deboriada dl centenà dla Pröma Vera Mondiala, n momënt storich dolorus y controvers por nüsc raiuns: ciafè n’acordanza deboriada al monn de lingaz talian y todësch é n travert y na basa importanta inće por le dagnì.“
L’ultimo tema che é gnü tratè é stè chël dla nasciüda de na macroregiun alpina: le proiet gnarà presentè ala Comisciun europeica tl mëis de jügn, „y bele da d’altonn podaraunse passè ala fasa operativa“, à stlüt jö Kompatscher. Le minister di afars ésters Sebastian Kurz à ćiamò analisé adöm cun le presidënt dla Provinzia les chestiuns che reverda le marćé dl laûr y l’ocupaziun, ti fajon i complimënć al Südtirol por les bunes previjiuns che i indicadus economics confermëia.
rc
Galaria dales fotografies
