Atualità
Kompatscher s’incunta cun le presidënt Fischer, sconanza dl'autonomia
La sconanza y l'evoluziun dl'autonomia südtiroleja ti ćiaran ala reforma costituzionala che vëgn tratada tla Talia. Chësc è l’argomënt prinzipal tl zënter dl’incuntada da incö (19 de forà) a Hofburg danter Arno Kompatscher y le presidënt Heinz Fischer, olache al é gnü sortissé ćiamò n iade le rode dl'Austria sciöche "garanta dl’autonomia".
Kompatscher ti à portè dant al presidënt austriach i contignüs dla tlausola de sconanza danter Stat talian y i resultać de süa incuntada cun le premier Matteo Renzi, olache al é gnü sotrissé la desponibilité a n laûr fat adöm da Roma y Balsan te n'otica de valorisaziun dles autonomies responsables. "Cun le govern talian – à splighé Arno Kompatscher – él gnü fat fora na tlausola de sconanza varënta sides por la Provinzia de Balsan, che por chëra de Trënt y tl Südtirol él a vigni moda bele gnü metü a jì n'opera de revijiun fata fora dal Statut d’autonomia".
Aladô dl presidënt südtirolej jaràra debojëgn da "renforzè chë sensaziun de responsabilité che à fat a na moda che l'autonomia südtiroleja nascess y se svilupass positivamënter. Respet a dan da 40 agn é i tëmps mudà, mo chi valurs é plü co mai atuai". Tratan l'incuntada cun le presidënt Fischer à Kompatscher inće recordè l'importanza dla funziun de sconanza dl'Austria ti confrunć dl Südtirol. "N rode sotrissé cun forza dal barat de lëtres danter Renzi y Faymann - à ajuntè Arno Kompatscher – y che rapresentëia n'atra garanzia por le svilup tl dagnì dl'autonomia".
Le presidënt austriach Heinz Fischer à dagnora desmostrè n gran interès por la situaziun südtirolej y taliana y à sotrissé che "i svilups da dan da püch à renforzè ćiamò deplü le prinzip de consëns danter Roma y Vienna, desmostran le rode concret dl'Austria sciöche potënza che scona. L'acordanza finanziara arjunta rapresentëia na soluziun che va bun por dötes les perts y n vare implü dal punt d’odüda dla politica autonomista portada inant tl Südtirol".rc
Galaria dales fotografies
