Atualità
Dé d’informaziun por jones y jogn por chirì laûr incö a Balsan
Sura 100 jones y jogn à tut pert incö domisdé (23 de forà) ala scomenciadia „Job and Life“ metüda da jì dal Zënter de mediaziun y laûr de Balsan tla sënta dla Repartiziun Laûr a Balsan por s'informè sön le monn dl laûr y les prozedöres tratan la chirida.
Incö domisdé (23 de forà) él gnü organisé tla sënta dla Repartiziun Laûr a Balsan n domisdé informatif ponsè por ti alisiré ala jonëza l’orientamënt y l’entrada tl monn dl laûr. "L’obietif prinzipal dl proiet Garanzia jonëza é chël da ti ofrí ai jogn y ales jones - insciö le diretur dla Repartiziun Laûr Helmuth Sinn - na suraodüda generala y na seria de oportunitês por se möi plü saurì tratan la chirida de n laûr, de na formaziun o de n curs de ajornamënt."
Dër contënt dl suzés dla manifestaziun d’informaziun é Michael Mayr, diretur dl Sorvisc Laûr dla Repartiziun che sotlignëia che „chësc domisdé d’informaziun é öna dles ativitês zentrales dl proiet „Garanzia jogn“ y che é ponsè dantadöt por i jogn sot ai 25 agn che chir n post de laûr o na formaziun che ti pormët da s’integrè te na manira asvelta tl monn dl laûr. I ùn insciö metü a desposiziun te nosta sënta na seria de sorvisc y organisaziuns che po daidé i jogn che ô ciafè informaziuns.“
Sura 100 jones y jogn à anuzé l’ocajiun por tò pert a valgönes conversaziuns d’informaziun y d’orientamënt cun i impiegà y esperć che fej pert dla Repartiziun Laûr, sciöche inće dl’ Union di osć y ostis dl Südtirol, dl’Assoziaziun provinziala di artejans (APA), dles agenzies de mediaziun por n laûr Business Pool, Look4U, Personal consultino, Staff&Line, Gi Group, Archimede y Adecco.
Por plü informaziuns sön le proiet „Garanzia Jogn“ y sön la Repartiziun Laûr él poscibl da s’informè inant sön la plata internet: www.provincia.bz.it/garanziagiovani.
rc
Galaria dales fotografies
