Atualità
I parcs naturai chîr junior ranger
Inće chësc ann arà i mituns y les mitans danter i 10 y i 11 agn la poscibilité da tò pert a dui cursc (un por talian y l'ater por todësch) de „Junior ranger di parcs natuari“, na scomenciadia che „à l’obietif da informè i mituns sön plü temesc che reverda la natöra y sön le dërt comportamënt da tignì sön les munts y ti bosć“, insciö l’assessur por l’ambiënt Richard Theiner.
L’Ofize provinzial Parcs naturai organisëia inće por chësc ann indô, adöm ales Lies da munt dl AVS y le CAI Südtirol, le proiet „Junior Ranger Südtirol“, cun chël che al ti vëgn dè la poscibilité ales mitans y ai mituns danter i 10 y i 11 agn da imparè da conësce, te na manira plajora y informativa, da plü daimprò i aspeć desvalies che reverda la sconanza dla natöra y dla contrada südtiroleja. La formaziun por ciafè le titul de „junior ranger“ döra indöt ot dis tratan i mëisc da d’isté.
La formaziun da junior ranger vëgn pitada se baratan jö te düć i 7 parcs naturai: chësc ann vëgn la formaziun pitada dal Parch natural „Monte Corno“ dlungia Salurn y Auer y dal Parch natural Trëi Pizes de Lorëi dlungia Toblach y Cortina. Le program dla formaziun reverda l’orientamënt, la sciënza dles chertes, le pröm aiüt sö por munt, l’ecologia dl survival (suravire tla natöra), inseć, la flora y la fauna dles munts, l’osservaziun dla salvarjina, anfibs y retii. Implü vëgnel metü a jì esperiënzes de scoverta direta cun ativitês d’orientamënt y de pröm aiür sö por munt cun le GPS. Tratan la festa de contlujiun, che gnarà tignida ai 13 de setëmber dl 2015, podarà i partezipanć, che à tut pert a almanco cinch dis de formaziun, pié do n diplom de contlujiun. I pići rangers nüs gnarà daldô invià a scomenciadies y proieć che reverda la proteziun dla natöra inće tl dagnì. Por vigni grup él preodü 15 partezipanć.
I geniturs po scrì ite i mituns y les mitans ćina ai 30 de aurì dl 2015, l’iscriziun costa 90 euro. Tl prîsc él calcolè laprò l’atrezadöra, la poscibilité da dormì, i pasć y la festa de contlujiun. Por informaziuns plü monüdes por i cursc por talian prëibel contatè Ivan Plasinger (zënter de vijites dl parch natural Monte Corno, tel. 0471 869247, ivan.plasinger@provinz.bz.it) o la sënta dl CAI Südtirol (tel. 0471 402144, segreteria@caialtoadige.it). L’iscriziun é poscibla ćina ai 23 de merz.
Informaziuns plü detaiades por i cursc tl lingaz todësch pon ciafè da Ruth Mutschlechner, Ćiasa dl Parch Natural Trëi Pizes de Lorëi ( tel. 0474 973017, ruth.mutschlechner@provinz.bz.it), o por Josef Hackhofer (sënta di Parcs naturai a Bornech, tel. 0474 582331, josef.hackhofer@provinz.bz.it) o por la Lia da Munt dl AVS (Tel. 0471 978141, office@alpenverein.it). An po se scrì ite tres l’AVS dal pröm de merz inant.
Le program di cursc é indere desponibl sön internet tlican sön http://www.provincia.bz.it/natura-territorio/temi/parchi-naturali.asp
rc
