Atualità
Vire le Südtirol al Expo 2015: Presentaziun de stand y conzet
Al pröm de mà metarà man l’Expo 2015 a Milan. Le Südtirol se presentarà te chësta ocajiun cun n stand a pert. „Le moto universal dla manifestaziun è ’Nudrì la tera, energia por la vita’ che se coliëia inće dër bun cun le Südtirol. Cun nosta presënza orunse ti pité ai vijitadus n’odlada reala ala manira de vire südtiroleja“, insciö le presidënt Kompatscher incö ala presentaziun dl stand südtirolej.
'Feeding the World, Energy for Life', chësc é le moto dla Expo 2015, che dauriarà sües portes al 1 de mà ćina ai 31 d’otober cun n numer de vijitadus preodü de söporjö 60-70 miliuns de porsones da döt le monn. Südtirol sarà presënt cun n stand aposta al intern dla presënza dl’Expo dla Talia, paîsc ospitant. „Chësta é na poscibilité unica por ti presentè nosta tera a esperć y vijitadus da döt le monn y inće por les families che jarà a vijité l’esposiziun mondiala“, à splighé incö (02/03) le presidënt dla Provinzia Arno Kompatscher tratan la conferënza stampa, te chëra che al é gnü presentè la forma y le conzet dla presënza dl Südtirol al‘Expo. „L’Expo da denant a Shanghai é gnüda vijitada da 70 miliuns de porsones“ – insciö le presidënt dla Provinzia – „y por chësta ediziun él inće söporjö 130 naziuns che à fat investimënć por indöt n miliard de euro por ti presentè süa tera al publich.“
Le stand dl Südtirol gnarà fat sö cun lëgna de lersc y arà plü alzades cun n‘altëza de indöt 13 metri. „Por nos él important che la presënza ais inće n profit“, insciö le presidënt dl EOS Hansjörg Prast, „le conzet sarà inovatif, mo se coliëia inće dër bun cun nosta tradiziun.“ Ala presënza dl Südtirol vëgnel bele laurè da dui agn, inće cun partners privać, insciö Prast.
Le diretur dla SMG Marc Pappalardo à presentè le moto dla presënza südtiroleja: deache l’Expo é na manifestaziun internazionala él gnü chirì fora le moto 'Live the balance', che por ladin podess gnì traslatè cun „Vir tla balanza“. I contignüs y la costruziun dl stand dl Südtirol se basëia sön set pilastri: la contrada, les porsones, l’architetöra, la cultura da vigni dé, la sostenibilité, les competënzes alpines y le mangé.
L’architët Manuel Benededikter à presentè inultima les carateristiches tecniches dl proiet. La strotöra de presentaziun dl Südtirol à na spersa de 75 metri cuadrać y gnarà portada da set taies de lëgn che rapresentëia vignöna n aspet tematich desvalì. Tres l’altëza àn orü cherié na strotöra dinamica che i vijitadus po vire, arpizé y concuisté. L’entrada al stand é dedicada ales spëises y le mangé tipich südtirolej, les alzades dessura pîta lerch y l’ocajiun por incuntades y situaziuns de relassamënt. „L’ospitalité y la natöra é dui elemënć che caraterisëia le Südtirol“, insciö Benedikter „ y insciö é inće le moto 'Live the balance' che condüj sciöche na vëta cocëna al intern de döta la creaziun.“
„L’edema dai 10 ai 17 de messè sarà dedicada daldöt al Europaregiun“, à splighé Kompatscher y à injunté che chësta sarà inće na poscibilité por ti presentè ai vijitadus „na picera Europa tl cör dl’Europa.“ Le presidënt à recordè inultima che „por le Südtirol é l’Expo bele n suzès, conscidran la soma di laûrs che ti é gnüda surandada ćina śëgn a nostes impreses.“
L’investimënt da pert dla man publica por la presënza dl Südtirol é de söporjö un n miliun de euro, inanter chisc él da calcolè 550.000 mile euro por l’afit dla lerch, cosć por le personal, le mantignimënt, les scomenciadies al intern y i.i. Al é preodü da arjunje inće n contribut de 400.000 euro da pert de partners privać.
rc
Galaria dales fotografies
