Atualità
Dala Junta: Re-ejaminaziun dles conzesciuns, i esperć é gnüs nominà
La Junta provinziala à nominé incö (3 de merz) i esperć aldinfora dl’aministraziun publica che à l’inćiaria da ejaminé danü les conzesciuns idroeletriches. Dl grup de esperć fejel pert le professur de iurisprudënza Fabrizio Figorilli, l’idrobilogh Giovanni Rossi y Ernst Pürer, ex –suranstant dla Voralberger Illwerke AG.
La nominaziun de na ligna de esperć por la re-ejaminaziun dles conzesciuns di gragn implanć idroeletrics é gnüda stabilida dala Junta provinziala sön proposta dl consulënt Giusppe Caia tl aurì dl 2013. Incö (mertesc ai 3 de merz) é le percurs che à metü man dan da dui agn rové a contlujiun cun la nominaziun de trëi porsones che formarà l’organn de consultaziun: al se trata de Fabrizio Figorilli, vize-retur dla Université di Stüdi de Perugia y professur de dërt aministratif, dl idrobiologh Giovanni Rossi y de Ernst Pürer, ex – suranstant dl Vorarlberger Illwerke AG, impresa austriaca che laôra tl setur dl’energia. „Düć trëi é esperć conesciüs a livel internazional – à sotligné le presidënt Arno Kompatscher – cun competënzes reconesciüdes sides tl ćiamp tecnich, co te chël iuridich.“
L’inćiaria dl grup di esperć sarà chëra da analisé y da ejaminé danü les valutaziuns metüdes sö dai ofizi competënć por ći che reverda i proieć presentà por l’assegnaziun dles conzesciuns di gragn implanć idroeletrics. „Tres chësta manira orunse garantì n iter trasparënt y de cualité dl prozès che i ùn metü man da n valgügn mëisc por la re-ejaminaziun dles conzesciuns“, insciö l’assessur competënt Richard Theiner. Tles ultimes edemes à i Comuns interessà ciafè döta la documentaziun nezesciara y à śëgn la poscibilité da dè jö n so arat. Contemporaneamënter gnaràl fat ti proscims dis na valutaziun sön le pëis por l’ambiënt (VIA) por mëte man concretamënter la chestiun che reverda la valutaziun nöia dles conzesciuns. La prozedöra dess gnì stlüta jö bele ćina la pröma edema de aurì.
rc
