Atualità
N düle é romagnü stlüt ite tl Palaz provinzial 2 a Balsan
N intervënt de prescia nia da vigni dè à i volontars dl „Zënter de cura di vicì“ de Balsan messü fà incö (3 de merz): ai à recuperè n düle che ê restè sarè ite tratan la nöt tla curt interna dl palaz provinzial 2 sön la plaza Silvius Magnago.
Le tier, n gran düle (bubo bubo) é gnü odü da doman adora da n valgügn dependënć tles alzades plü altes dl palaz provinzial 2 dlungia la staziun dles ferates da Balsan, olache al é stè bonamënter sura nöt: la curida de spidl dla strotöra ne ti à nia conzedü al düle da jorè demez cun l’orì de sorëdl, che a portè, de conseguënza, a sprigorè le vicel.
Insciö él gnü cherdè adalerch i volontars dl "Zënter de cura di vicì" de Balsan che é stà bugn da abiné y salvè le düle. „A pert la spordüda ti vara bun al tier, al gnarà vijité da n dotur dai tiers por gnì daldô lascè indô lëde“, à splighé le volontar Francesco Viglia do l’operaziun de recuperamënt. Do l’arat dl espert ne é la presënza de düli tles vijinanzes de Balsan nia de morvëia, deache ai adora chësc raiun de nöt sciöche resserva de ćiacia. Le gran düle salvè fej pert dla sort di majeri düli, cun na daurida dles ares de 1,60 metri ćina 2 metri y cun n’altëza che po jì dai 65 ai 80 zentimetri.
rc
Galaria dales fotografies
