Atualità
Inovaziun y archirida: 110 miliuns de euro por le program 2015
I fonds metüs a desposiziun dal program 2015 por l’inrescida scientifica y por l’inovaziun é de indöt 110,3 miliuns de euro. Incö (11 de merz) él gnü aproé le documënt strategich ćina al 2020 da pert dla Consulta cun a ćé le presidënt Kompatscher. Tl dagnì gnaràl inće sostignì tres de plü la colaboraziun danter i partnes dl setur.
La Consulta provinziala por l’inovaziun y por l’inrescida à aproè incö i programs por l’ann 2015 cun n investimënt total de 110,3 miliuns de euro. La plü gran pert dles ressurses vëgn dedicades al’Université y al’archirida, cun n investimënt complessif de 84 miliuns de euro partis sö danter la LUB (59,9 miliuns) y l’EURAC (21,1 miliuns de euro). Por l’invoaziun él preodü n investimënt de söporjö 26 miliuns de euro, de chisc vëgnel adorè 18,4 miliuns diretamënter por sostignì l’ativité de archirida y le svilup di prozesc y produć dles impreses por mirit dl sistem de contribuć y dles bandides de concurs. Implü él gnü aproè tl program d’atri dui aspeć importanć che reverda les convenziuns programatiches cun i ënć che laôra söl teritore y le sostëgn al trasferimënt tecnologich dala archirida ales impreses.
„Atualmënter – à sotligné le presidënt dla Provinzia Arno Kompatscher – fej i investimënć tl’archirida y tl svilup fora le 0,6 porcënt dl PIL dl Südtirol. Nosc obietif é chël da aumentè te na manira sostanziala chësta perzentuala, tres n pëis maiù dl’inovaziun sön le bilanz provinzial, un di seturs fondamentai por la competitivité y le bëgnester de nosc teritore. Por mëte adöm n sistem efiziënt ne bàstel nia ma da aumentè la cuantité di investimënć, mo al depënn inće dala cualité y efiziënza di programs, che po ma gnì arjunta cun na colaboraziun cun düć i partners dl setur.“
La colaboraziun trasversala danter les istituziuns de archirida y les impreses privates é inće un di passajì prinzipai dl documënt strategich aproé inier dala Consulta, n proiet de dorada lungia (ćina l’ann 2020) che mëss gnì de jö da dötes les regiuns dl’Uniun Europeica. Tl zënter dla programaziun, che à inom „Smart specialisation strategy por la Provinzia de Balsan“, él la coordianziun de döta la rëi d’archirida y dl’inovaziun, che prevëiga n dialogh maiù y na colaboraziun plü strënta danter düć i auturs dl sistem.
rc
