Atualità
Le show di ponjins daurì incö al Museum Natöra dl Südtirol
Al Museum Natöra dl Südtirol él gnü inaudè incö, lönesc ai 16 de merz, la mostra cun i ponjins y i conići, che é rovada ala nona ediziun y che àn podarà vijité ćina ai 6 de aurì. Les tlasses scolastiches é periades da prenotè.
Ponjins y di conćini é da odëi da incö inant ćina ai 6 de aurì al Museum Natöra dl Südtirol por la ligrëza de mituns y adulć. Le „show di ponjins“ podarà gnì vijité düć i dis ćina ai 6 de aurì dales 10 ales 18 (ultima entrada ales 17.30), olache i mituns y les families podarà ti ćiarè y aziché i tiers. L’entrada é de 3 euro ( le prîsc smendrì é de 2 euro, l’ingrés por la familia é de 6 euro, l’ingrés combiné „show + museum“ é de 5 euro). I mituns ćina i 6 agn pò vijité le museum debann. Les tlasses scolastiches (2 euro por scolar) é damanades da prenotè les vijites telefonan al 0471 412975.
L’ambiënt, te chël che i ponjins y i conići sojornarà tles proscimes trëi edemes, é ponsè dantadöt por le bëgn di tiers. I ponjins arà a süa desposiziun sperses ampies olache ai à la poscibilité da se möi, sciöche inće zones por palsè y cun protreziuns dala presënza dl publich. Ala fin dla manifestaziun gnarài i ponjins scinćà a lüć da paurs da munt. I conići gnarà mantignis inant da sü proprietars , che i à metü a desposiziun por la mostra.
Vigni dé gnarà i tiers analisà y controlà da doturs dai tiers por controlè süa sanité. Dal lönesc al vëndres, tres dales 16.30 ales 17.30, saràl presënt n dotur dai tiers che sarà a desposiziun por informaziuns y detais ai vijitadus. L’esposiziun é organisada en colaboraziun cun la Federaziun Zidladus Conići dl Südtirol.
Informaziuns: Museum Natöra Südtirol, via Bottai 1, Balsan, tel. 0471 412964, web http://www.museonatura.it/.
rc
Galaria dales fotografies
