Atualità
Dala Junta: Cinch films nüs y sostëgn ala pre-produziun
La Junta provinziala à aproè incö (17 de merz) la pröma pert di finanziamënć dl 2015 che reverda le sostëgn de films de documentaziun y d’aziun che vëgn registrà tl Südtirol. I esperć dla BLS à chirì fora i cinch proieć che gnarà sostignis tres le Fonds südtirolej por les produziuns.
La condiziun prinzipala dl sosëgn finanziar publich por la produziun de films é chëra che la soma conzedüda mëss gnì re-investida por almanco le 150 porcënt tl Südtirol. „La soma d’investimënt dla Provinzia, por i cinch proieć aproà cun chësta pröma mosöra dl 2015, reverda 1,53 miliuns de euro – à splighé incö le presidënt Arno Kompatscher do la sentada dla Junta – le davagn stimé é de 2,8 miliuns de euro.“ Indöt él preodü 116 dis de laûr da filmé tl Südtirol cun la presënza de aturs, profescionisć y colaboradus dles ćiases de produziun. La Junta à aproè le sostëgn finanziar da ćiases de produziun de Viena, Berlin, la Gran Bretagna y dui dal Südtirol.
Un di proieć locai che é gnüs inseris tla pröma pert de finanziamënć é le film d’aziun „Three Peaks“ dla firma de produziun dla „Echo Film“ da Balsan, che é gnü registré daldöt tl Südtirol. Le secundo proiet che vëgn sostignì é na documentaziun sön la forza de cura dles erbes da munt dal titul „Das Geheimnis der Bergkräuter“che é gnüda realisada dala ćiasa de produziun „Miramonte Gilm“ de Balsan. Implü él gnü inserì te chësta pröma aprovaziun dl 2015 la produziun internazionala „Man in the Box“, cun i aturs Martina Gedeck y Thomas Kretschmann.
Le presidënt Kompatscher à sotligné implü che la Junta à dè löm vërda por n contribut de sostëgn finanziar por la fasa de pre-produziun por la realisaziun de n film che reverda le romann „Eva dorme“ de Francesca Melandri che trata la storia dl Südtirol tratan y do la Secunda Vera Mondiala. Döt le film dess gnì tut sö te Südtirol, le regist dl film sarà Edoardo Winspeare.
Tl 2015 él preodü ćiamò dui d’atri terminns por dè jö proieć, de mà y de setëmber.
rc
