Atualità
Dala Junta: Stabilis i proscims vari por la sanité a Sanćiana
La Junta provinziala s’à dè jö incö te süa sentada edemala dl 17 de merz cun la stlüta dla repartiziun dl stè da pert de Sanćiana, na dezijiun che é gnüda sostignida tres n documënt unitar metü adöm danter les rapresentanzes dles categories profescionales dl ospedal da Sanćiana y dla direziun dl Raiun soziosanitar dla Val de Puster. Intratan él gnü istituì n grup de laûr por atué i proscims vari.
Adöm cun la dezijiun dla stlüta dla repartiziun dl stè da pert de Sanćiana por i 31 de merz él gnü metü sö n grup de laûr sot ala direziun dl diretur dl Raiun soziosanitar de Bornech, Walter Amhof, cun l’inćiaria da programè i proscims vari por la realisaziun de n ambulatore de êfons.
La Junta à confermè che da aurì inant sarà l’assistënza dles ëres y di viadus assigurada tres n’acordanza danter les êfons y les assistëntes soziales dl raiun soziosanitar. „Por merit de chësc sorvisc saràl poscibl da garantì n miù sostëgn a dötes les ëres dla Val de Puster“, à sotligné l’assessuria provinziala por la sanité Martha Stocker do la sentada dla Junta. Implü él preodü che les êfons laôres inant tl salf da stè da pert por amplié sües conescënzes y esperiënzes pro l’assistënza dan, tratan y do les nasciüdes.
Dl grup de laûr sot ala direziun de Walter Amhof fejel pert le coordinadù dla sanité Thomas Lanthaler, le primar Bruno Engl, la suranstanta dl sorvisc de cura Helene Burgmann, la suranstanta dl’aministraziun dl ospedal da Sanćiana Renate Plitzner, la suranstanta dla repartiziun de ginecologia y dl stè da pert Veronika Bacher, la coordinadëssa dles êfons Sara Zambelli Pavà, l’assessuria comunala Simone Wasserer y l’assistënta de direziun Maria Rieder.
rc
