Atualità
Imparè da conësce les istituziuns dl’UE: Euregio Summer School a Bruxelles
Inće chësc ann pitarà la Rapresentanza dl’Euregio Südtirol-Tirol-Trentin n’oportunitè por imparè da conësce da plü daimprò les istituziuns dl UE a Bruxelles. L’Alpeuregio Summer School ti darà la poscibilité a jogn laureà, y tl 2015 por le pröm iade inće ai studënć, da fà n’esperiënza direta a contat con les istituziuns politiches dl’Uniun Europeica. Domandes ćina ai 15 de aurì.
Do le suzés dles ediziuns da denant mët da jì la rapresentanza dl’Euregio a Bruxelles inće chësc ann l’Alpeuregio Summer School, na scomenciadia de formaziun por imparè da conësce da plü daimprò les istituziuns y le funzionamënt di sistem politich dl’Uniun Europeica. Le curs gnarà tignì por inglesc dai 22 de jügn ai 2 de messè y é davert por jogn ćina ai 30 agn che vëgn dal Tirol, Südtirol y dal Trentin. Por le pröm iade pol se iscrì inće studënć dl terzo ann de stüde che à sostignì almanco un n ejame che reverda l’Uniun Europeica. Les domandes de partezipaziun po gnì dades jö ćina ai 15 de aurì.
Le fin dl proiet de formaziun "Alpeuregio Summer School" é chël da coliè les conescënzes teoriches dl stüde sura la politica dl’Uniun Europeica cun n’esperiënza direta tles istituziuns europeiches söl post a Bruxelles. Le curs vëgn metü da jì dai 22 de jügn ai 2 de messè tres le Grup europeich de cooperaziun teritoriala (GECT) dl’Euregio cun n numer de 30 posć a desposiziun. Fà domanda po düć i laureà dal Südtirol, Trentin y Tirol y, por le pröm iade, inće i studënć tl terzo ann de stüde che à stlüt jö almanco un n ejame che reverda l’Uniun Europeica. Le curs sarà por inglesc.
La bandida dl concurs por la partezipaziun al’Alpeuregio Summer School 2015 gnarà publicada ćina mez forà sön la plata internet dla rapresentanza dl’Euregio a Brüssel (www.alpeuregio.org). Ai partezipanć dl Südtirol él la Cassa de Sparagn che ti dà n contribut de 300 euro por la curida dles spëises dl iade y de sojornanza, che i partezipanć mëss curì instësc, le curs indere é debann.
rc
