Atualità
App „Südtirol To Go“: Funziuns nöies y 20.000 desćiariades
Cun na iesta grafica nöia, na funziun de chirida otimisada y na seria de resultać miorada se presentëia da püch la app „Südtirol ToGo“ dl’Agenzia provinziala por la mobilité. L’app à arjunt sura 20.000 desćiariades y é desponibla por android, iOS y Windows Phone.
La app „Südtirol ToGo“ por smartphones é la pröma app che racöi dötes les informaziuns sön les lignes dles corieres, sides tles citês co tl rest dl Südtirol, dles ferates y dles furnadoies publiches. La app é en funziun da l’isté 2014 por Android, iOS y, da d’altonn inće por Windowsphone. Ćina incö é la app gnüda desćiariada sura 20.000 iadi tles variantes linguistiches presëntes y sön dötes les plataformes por i fonins desvalies. Inće le numer di anuzadus é por le momënt de 600 al dé. „Les funziuns digitales, sides te internet co inće pro i smartphones, ti pormët ai anuzadus da inrescì les trates y i orars dl trasport publich local. Implü é l’app inće na fontana d’informaziun importanta por i zitadins por ciafè informaziuns te vigni momënt y te vigni ora“, insciö l’assessur por la mobilité Florian Mussner. „Por merit dles segnalaziuns di zitadins ùnse podü mioré l’app – la mudaziun plü importanta é na chirida dles architades plü scëmpla, cun les architades plü importantes che vëgn mostrades atira tl mëteman“, spliga le diretur dla Agenzia por la mobilité Roberto Rubbo. Implü él gnü fat mioraziuns por la banca dać dles lignes y pro la chirida tres le plann di orars dl trasport publich, por che la chirida sön les 5000 architades tl Südtirol devëntes plü strotorada.
N’atra novité é che les ultimes cinch architades che l’anuzadù à chirì romagn salvades, a na manira che ares po gnì ciafades plü saurì por na secunda chirida. Implü pon inće adorè l’app por les chirides ti idioms dl ladin de Gherdëna y dla Val Badia. Inće la iesta dla app é gnüda ajornada. Le proscim vare sarà chël che i sorvisc dl trasport publich publicarà diretamënter sü dać por i mët inće a desposiziun di anuzadus dla app Südtirol togo.
rc
Galaria dales fotografies
