Atualità
Comisciun paritetica Provinzia – CONI: contribuc y proiec
I proiec concordá dala Provinzia y dal CONI por favorí le sport dl Südtirol y le finanziamënt dles strotöres sportives é stades al zënter dla pröma sentada dla comisciun paritetica nöia danter la Provinzia y le Comitê olimpich nazional talian, che á l’inciaria fina l’ann 2018.
Incö, jöbia ai 26 de merz él gnü tigní la pröma sentada dla comisciun paritetica nöia danter la Provinzia y le CONI che é gnüda istituida, sciöche dal protocol d’acordanza, por la perioda 2015 – 2018. „Al é sté n’incuntada tratan chëra che i ún aprofondí la planificaziun di investimënc y olache i sun stá bugn da ciafé n’acordanza sön les priorités che reverda i proiec“, sotlignëia l’assessuria por le sport Martha Stocker. Ala reuniun ál ince tut pert le diretur dl Ofize Sport Armin Hölzl, le presidënt dl comitê provinzial dl CONI Heinz Gutweniger, dui esponënc dl CONI nazional, la responsabla dla promoziun Cecilia D’Angelo y le responsabl por la preparaziun olimpica Carlo Mornati.
Tratan la reuniun él dantadöt gnü debatü sön i proiec concordá bele sön la basa dl protocol d’acordanza da denant, danter l'ater por ci che reverda l’aprovaziun dla licuidaziun dl contribut CONI por la pista de schiroll y dl zënter dl biathlon a Martell, por la pista de schicross de Watles a Mals, por la restruturaziun de n implant d’atletica a Lana y por na pröma pert de finanziamënt dl zënter por i alenamënc dl FC Südtirol che vëgn costruí a Eppan. La soma totala dl contribut reverda indöt 1.255.000 euro. Implü á la comisciun confermé i proiec de ressanamënt dl ciamp dl sport Combi a Maran y l’ampliamënt dl palaz dla dlacia a Sterzing. Inultima él gnü stabilí tla sentada i criters por la colaboraziun tl dagní, che ará le focus sön implanc de interes nazional por la preparaziun ales Olimpiades. La proscima incuntada sará de natöra tecnica danter jügn y messé por stabilí i investimënc preodüs plü inant.
rc
