Atualità
La Junta atribuësc danü les conzesciuns di implanc idroeletrics
„Cun la re-ejaminaziun y l’assegnaziun nöia dles conzesciuns únse stlüt jö le capitul dl’assegnaziun iregolara de n valgönes conzesciuns por gragn implanc idroeletrics“, insciö le presidënt Arno Kompatscher incö (31/03) do la sentada dla Junta. „I ún indô arjunt la situaziun de legalité y chësta dezijiun é la basa por la reorganisaziun dl setur dl’energia“, á ajunté l’assessur Theiner.
Sön la basa di resultac dla prozedöra dl’ejaminaziun nöia á la Junta provinziala stabilí incö, mertesc ai 31 de merz, i davagnadus di concursc por les 10 conzesciuns por l’anuzamënt di gragn implanc idroeletrics che é gnüdes conzedüdes iregolarmënter il 2010 y che reverda Lappach, Mühlen te Türesc, Sarnthein, Pruca, Porsenú, St. Pankraz, Lana, Kuppelwies – St. Walburg, Töll y Kardaun. La conzesciun por l’implant idroeletrich de St. Antone a Balsan é bele gnüda surandada ai 3 de forá dl 2015 al conzescionar nü, la „Eisackwerk GmbH“.
Te 9 caji sön 10 é le davagnadú dl 2010 gnü confermé incö dala Junta provinziala sön la basa dles valutaziuns di ofizi competënc, dles comisciuns y di grups d’esperc. De conseguënza él la sozieté SE Hydropower che mantëgn les conzesciuns di implanc idroleletrics de Kardaun, Porsenú, Sarenthein, Lana St. Pankraz, St. Walburg – Kuppelwies, Mühlen te Türesc, Waidbruch y Töll. Anulada vëgn indere la conzesciun por l’anuzamënt dl implant de Lappach, che gnará assegnada danü. Chiló ne él sté degöna sozieté che á ademplí ai criters de valutaziun.
„La Junta provinziala á stlüt jö chësta chestiun do la spartiziun iregolara dles conzesciuns por l’anuzamënt di implanc idroeletrics y mëna inant n sëgn tler de mudamënt dla politica tl setur dl’energia tl Südtirol“, á sotligné le presidënt Arno Kompatscher incö do la sentada dla Junta. Implü é chësc n vare important por renforzé la crëta tl’aministraziun publica. „Cun la prozedöra de re-ejaminaziunn dles conzesciuns únse indô restabilí la legalité y chësta é ince la basa por i proscims vari tl setur dl’energia, che sará la cumpra dles cuotes dala ENEL y la fujiun danter la SEL y l’AEW“, á sotligné l’assessur por l’energia Richard Theiner che á injunté che chëstes döes prozedöres dess porté a n valur ajuntif por döta la popolaziun südtiroleja. L’assessur Theiner á inultima ciamó assiguré che i Comuns de confin ne ará degun smendrimënt di fonds de compensaziun tl dagní, deache la Junta á tut la dezijiun da garantí le contribut plü vantajus por i Comuns.
Bele tl mëis de aurí dl 2013 â la Junta provinziala stabilí, sön la basa de n’arat tecnich dl iurist Giuseppe Caia de Bologna, na revalutaziun dles domandes dles conzesciuns che reverda i gragn implanc idroeletrics. La prozedöra de re-ejaminaziun é gnüda condüta dai Ofizi Refornimënt de forza eletrica, Gestiun ressurses d’ega y Valutaziun dla faziun sön l’ambiënt sciöche ince da na comisciun de esperc. Le professor Fabrizio Figorilli, espert de chësta materia y comëmber dla comisciun esterna, á dit che „la comisciun á stlüt jö so laur cun n arat positif sön les valutaziuns dla re-ejaminiaziun fata, y che contëgn düc i elemënc nezesciars por tí pormët ala Junta provinziala da tó les dezijiuns se basan sön i resultac che i ofizi á presenté.“
rc
Galaria dales fotografies
