Atualità
Alpeuregio Summer School: iscriziuns cina ai 15 de aurí
Cina ai 15 de aurí pon se scrí ite ala Alpeuregio Summer School che ti dá la poscibilité a jogn laureá, y por le pröm iade ince a studënc, da fá n’esperiënza direta a contat cun les istituziuns politiches dl’Uniun Europeica. Les domandes po gní dades jö cina ai 15 de aurí.
Ince chësc ann organisëia la rapresentanza dl’Euregio a Bruxelles l’Alpeuregio Summer School, na scomenciadia de formaziun por imparé da conësce da plü daimpró les istituziuns y le funzionamënt di sistem politich dl’Uniun Europeica. Le curs gnará tigní a Bruxelles dai 22 de jügn ai 2 de messé y é davert por jogn cina ai 30 agn che vëgn dal Tirol, Südtirol y dal Trentin. Le curs sará por inglesc.
Les domandes de partezipaziun po gní dades jö cina ai 15 de aurí. Presenté na domanda de partezipaziun po düć i laureá dal Südtirol, Trentin y Tirol y, por le pröm iade, ince i studënc tl terzo ann de stüde che á stlüt jö almanco un n ejame che reverda l’Uniun Europeica.
La bandida dl concurs por la partezipaziun al’Alpeuregio Summer School 2015 é gnüda publicada sön la plata internet dla rapresentanza dl’Euregio a Bruxelles (www.alpeuregio.org). Ai partezipanc dl Südtirol él la Cassa de Sparagn che ti dá n contribut de 300 euro por la curida dles spëises dl iade y de sojornanza, che i partezipanc mëss curí instësc, le curs indere é debann.
USP
