Atualità
Record de vijitadus pro la show di ponjins tl Museum Natöra
Grana é stada l'afluënza ala show di ponjins tl Museum Natöra a Balsan che é jüda a fin en Lönesc de Pasca, ai 06 de aurí. Cun indöt 18.636 entrades é stá i vijitadus chësc ann sura le dopl tan tröc co tratan l’ediziun 2011. Al é le numer plü alt de vijitadus dala pröma mostra di ponjiuns dal 2001, tröpes é stades les families y i mituns.
N record de vijites cun 18.636 entrades á registré da püch le Museum Natöra da Balsan cun la mostra di ponjins y di loi, tratan chëra che al ê poscibl da odëi sciöche i ponjins nasc y de plü loi por trëi edemes cina le Lönesc de Pasca ai 5 de aurí. „La mostra é stada na buna poscibilité dantadöt por mituns y mitans dai 3 ai 10 agn por imparé da conësce le monn di museums da plü daimpró y por podëi amiré dal ví les morvëies dla natöra y dla vita di tiers“, á sotligné l’assessur por i museums Florian Mussner che á ince recordé che le Museum ti á ince chësc ann, sciöche bele dales ediziuns passades, dé na gran importanza ala sanité di tiers y di vijitadus. Insciö é i ponjins gnüs vijitá plü iadi dai doturs dai tiers y ti é gnüs surandá atira do le nasce ai lüc da paur.
Sciöche valur mesan á 887 porsones vijité al dé la show di ponjins, chësc é le valur plü alt che é gnü arjunt dala pröma ediziun dl 2001 y plü co dopl tan tröc co ciamó tl 2011 (olache les vijites é stade söporjö 7.000). Dër contënt dla ediziun garatada é le diretur dl Museum Natöra dl Südtirol, Vito Zingerle: „Dër n gran dilan oressi ti dí ales families y ai mituns, che é gnüs en dër tröc por odëi sciöche i ponjins nasc y por ti ciaré ai loi. Al nes á fat dër plajëi che l’ediziun da chësc ann é jüda tan bun, ti proscims agn fajará la show di ponjins, sciöche da tradiziun, na palsa de n valgügn agn.“ N rengraziamënt spezial ti speta ince al’organisaziun di zidladus de loi dl Südtirol por l’aiüt pro l’organisaziun dla mostra, insciö Zingerle.
Le Museum Natöra restará stlüt cina en sabeda ai 11 de aurí por laurs de ressanamënt y sará indo davert da en domënia ai 12 de aurí. Dai 21 de aurí sarál spo indô da odëi la mostra speziala „Lëdi y salvari“.
USP
