Atualità
Presentaziun de proiec por renforzé i jogn cun problems de comportamënt
Sura 2.000 mituns y porsones jones cun problems de comportamënt é gnüdes curades te Südtirol tl 2014. Te n’incuntada cun i media él gnü presenté incö, mercui ai 8 de aurí , les scomenciadies y i proiec por renforzé le sostëgn dantadöt de porsones jones cun patologies psichiatriches.
De plü stüdi dla Comisciun Europeica sotrissëia te sü resultac che la maiú pert di problems de comportamënt de porsones adultes é gnüs a se le dé tratan le tëmp dl’infanzia y dla jonëza. Indöt él da tó en conscidraziun che zirca le 20 porcënt de düc i mituns y di jogn presentëia valgügn aspec de na problematica psichica, mo che ma na pert de chisc problems mëss ince gní sotignis cun mosöres de sostëgn. Te Südtirol él gnü sostigní tl 2014 cun intervënc de cura indöt 2000 mituns y porsones jones cun problematiches psichiches, che fej fora zirca 4-5 porcënt de döta la jonëza dl Südtirol. Por ativé les mosöres de prevenziun y diagnosa abonora él nezesciar da avëi na buna colaboraziun danter les istituziuns y les families.
Tl contest de n’incuntada cun i media á l’assessuria por la sanité Martha Stocker presenté incö (08/04) dui proiec de renforzamënt de porsones jones cun problematiches psichiatriches che dess tó ite dötes les istituziuns che laora te chësc ciamp a livel provinzial, comprensorial y comunal. „Nos düc adöm sun responsabls por la sanité di mituns y di jogn cun problematiches de comportamënt“, á sotligné l’assessuria por la sanité Martha Stocker incö y á ajunté che porchël fossel important da cherié na coordinaziun dl sostëgn y dla cura por podëi ti daidé de na manira plü efetiva y asvelta ales families interessades.
Chësta rëi de coordinaziun dess tó ite na seria de istituziuns y porsones spezialisades ti ciamps dla psichiatria por mituns y jogn, dla Repartiziun Politiches soziales, di sorvisc de psicologia, di raiuns sanitars, dla signoria, dles cooperatives, dles trëi Intendënzes scolastiches y dla Garanta por l’infanzia y por l’adolescënza. Concretamënter él preodü da ti alisiré la chirida ales families por che ares ciafess te na manira plü asvelta les strotöres de sostëgn adatades a sü bojëgns, sciöche ince la creaziun de na banca dac y de n’educaziun trienala por referënc spezialisá, che dess ester i auturs de n model cun intervënc che cür döta la Provinzia.
Implü él gnü presenté incö dala pedagoga soziala Veronika Hafner le cudejel nü „Psychische Gesundheit im Kindes- und Jugendalter“ („Sanité psichica tl’eté di mituns y di jogn“) che contëgn na suraodüda dles patologies plü conesciüdes, dles metodes de cura y di contac de sostëgn plü importanc tl Südtirol. Ala realisaziun dl cudejel á lauré para danter l’ater Carla Comploj dl Sorvisc por la consulënza pedagogica y por l’integraziun dl’Intendënza ladina, le coordinadú dla psichiatria por mituns y jogn Andres Conca, la pedagoga soziala Veronika Hafner, la direturia dl sorvisc sozial dla comunité comprensoriala dl Wipptal Christina Tinkhauser, la Garanta por l’infanzia y por l’adolescënza Paula Maria Ladstätter y la presidënta dl’assoziaziun por i familiars y i amisc de porsones cun dificoltes psichiches Siglinde Jaitner.
USP
