Atualità
Concurs artistich: Les operes d’ert pó gní dades jö cina ai 29 de má
Düc i artisć y dötes les artistes dl Südtirol, de Fascia y di trëi Comuns de Suramunt á ciamó tëmp cina ai 29 de má da dé jö sües operes d’ert por le Concurs artistich 1915 – 2015 che é gnü scrit fora dala Repartiziun Cultura ladina en gaujiun dl centená dla Pröma Vera Mondiala. Le valur complessif di pesć é de 20.000 Euro. Ara se trata dla terza ediziun de chësc concurs.
Por tigní a mënt i avenimënc dla perioda dla Gran Vera dal 1914 al 1918 y por sostigní le svilup dl’ert de artisc locai á le Departimënt Cultura y Scora ladina scrít fora da püch, adöm cun cun Lia di artisć dl Südtirol, le "Concurs artistich 1915 – 2015". Le concurs é davert a dötes les artites y düc i artisć, che á süa residënza tl Südtirol o ti comuns ladins dl Vedl Tirol (Fascia, Fodom, Col de S. Lizia y Ampëz). Implü pól tó pert dötes les artistes y düc i artisć che é scric ite tl register AIRE te un di comuns dl Südtirol o te n comun ladin dl Vedl Tirol. „L’ert y l’ativité artistica é stromënc importanc por studié i avenimënc che é sozedüs tratan la Pröma Vera Mondiala, por visualisé la realté dla vera che é ince rovada te nostes valades. La scomenciadia é ponsada por promöie l'ativité artistica y por sotligné l’importanza dl valur dla pesc y dla convivënza pazifica“, spliga l’assessur por la cultura ladina Florian Mussner.
N aspet important pro l’elaboraziun dles operes d’ert sará le contrast y la descrepanza danter la orenté y l'euforia da combate tl mëteman dla vera y la realté crödia y les conseguënzes tragiches di avenimënc dla vera, che á porté a desperaziun, crudelté y dolur. Dötes les sorts d’ert pó tó pert al concurs (pitora, grafica, scoltöra, istalaziun, ert conzetuala, fotografia, video y i.i.).
L’ultim dé por dé jö é ai 29 de má dl 2015, dales 12.00, tla sënta dla Repartiziun Cultura y Intendënza ladina. I pesć é de indöt 20.000,00 euro y vëgn partis sö insciö: por le pröm post él scrít fora 7.000,00 euro, por le secundo post 5.000,00 euro y por le terzo post 3.000,00 euro. I cin artisć y aritstes che tól pert ala mostra adöm cun les operes premiades ciafa 1.000,00 euro por la realisaziun de süa opera. La bandida dl concurs y le formular de iscriziun é da ciafé sot a: http://www.provincia.bz.it/ntendenza-ladina/argumenc/leteratura.asp.
Por plü informaziuns prëibel contatè l’Ofize Cultura Ladina, strada Binder 29, 39100, Balsan, e-mail: alexander.piccolruaz@provinz.bz.it, telefonn: 0471 / 417020.
rc
