Atualità
Schuler: Amplié le sostëgn por l’archirida tl setur dl’agricoltöra da munt
Sostigní l’archirida tl setur dl’agricoltöra da munt por amplié süa importanza tl setur dl’economia locala: chësc á sotligné l’assessur provinzial Arnold Schuler tratan l’incuntada di mëmbri dla lataria „Brimi“ incö (17/04) a Porsenù. „Les lataries soziales dl Südtirol pó ciamó mioré süa posiziun tres n renforzamënt dla colaboraziun y sostigní insciö ince de plü i zidladús.“
Te so intervënt al’incuntada di mëmbri dla lataria Brimi da Porsenú, á l’assessur provinzial por l’agricoltöra Arnold Schuler sotligné che l’agricoltöra de munt é n fautur important dla realté locala dl Südtirol, te chëra che la popolaziun se reconësc y che i ghesć aprijëia, y á recordé te chësc contest la surandada de n memorandun, adöm al parlamentar europeich Herbert Dorfmann, al comissar europeich Phil Hogan por la restrotoraziun dles cuotes dal lat, „te chël che i prejentun propostes por la proteziun dles aziëndes de produziun de lat ti raiuns alpins.“
Schuler á laldé inant les cooperatives agricoles, „che contribuësc a garantí produc de cualité a de bugn prisc por ti assiguré n dagní ales aziëndes che laora sön les munts dl Südtirol.“ L’assessur Schuler ti á aconsié ales lataries soziales da mioré ciamó de plü la cooperaziun y á sotligné che l’archirida rapresentëia na sfidada fondamentala pro le dagní por svilupé inant l’agricoltöra da munt. Ti ultims agn él gnü stlüt jö, insciö Schuler, i pröms vari por amplié chësc setur, mo al mëss ciamó gní lauré inant deache resultac importanc po ma gní arjunc tres na colaboraziun danter l’archirida scientifica y l’esperiënza pratica.
rc
