Atualità
Dala Junta: La Provinzia se tol sö sües responsabilités
„Les tragedies de profugs tl Mer Mediteran obliëia ince le Südtirol da fá valch y da ne se trá nia zoruch, mo da confermé so impëgn de solidarieté“, chësc á sotligné incö, mertesc ai 21 de aurí la Junta provinziala fajon referimënt ala strategia de acoliënza di profugs, che vëgn realisada cun l’aiüt di Comuns.
Por le momënt únse te Südtirol zirca 420 profugs, „mo por guajia dles tragedies dramatiches di ultims dis tl Mer Mediteran mëss ince le Südtirol fá süa pert, tó sü plü porsones y les daidé te n contest de solidarieté y de dërc umans“, á recordé incö la Junta. La spartiziun di profugs vëgn fata dal Stat y vëgn stabilida tres na tlé de spartiziun che fej referimënt ala popolaziun locala sön le teritore. La popolaziun dl Südtirol fej fora le 0,9 porcënt dla popolaziun dla Talia y sön chësc dat vëgnel calcolé la perzentuala di profugs che röia tla Provinzia de Balsan.
Do la sentada dla Junta á le presidënt Kompatscher splighé che tl Südtirol él por le momënt cater strotöres d’acoliënza por profugs: trëi a Balsan (la caserma Gorio, le „Schwefelbad“ y la Ciasa de abitaziun por lauranc a Haslach) y öna a Maran (Ciasa Arnika). N’atra strotöra d’acoliënza é planificada a Wiesen tl’Alta Val d’Isarch, olache al ciafará lerch cina 50 porsones. „Tratan la sentada da incö á la Juntá provinziala inrescí, adöm ai Comuns, cares che podess ester d’atres strotöres adatades por l’acoliënza de profugs“, á dít le presidënt dla Provinzia Arno Kompatscher do la sentada dla Junta provinziala conscidran les condiziuns dramatiches di profugs che mëss lascé süa tera y vire te condiziuns dejumanes. „La comunité internazionala á le compit da messëi ciafé na soluziun por chësta situaziun drammatica.“
Le presidënt dla Provinzia Kompatscher á informé inant che al é gnü stlüt jö n proiet tla Siria – tla provinzia de Idlib – che é gnü sostigní dala Provinzia de Balsan y realisé da Ai.Bi en colaboraziun cun Syrian Children Relief. Le proiet „Baladi“ (Mi Paisc) á l’obietif da garantí la proteziun di dërc dles mitans y di mituns, dles ëres y dles families sirianes che á messü sofrí dala vera: al é preodü intervënc de sostëgn ales families por garantí le suravire y le renfornimënt de cater ospedai de socurs ala popolaziun tres n sostëgn de doturs spezialisá y cun la spartiziun de medejines.
Cina sëgn él indöt 100 les families che á ciafé n sostëgn alimentar mensil y guant, 3.700 porsones á ciafé assistënza sanitara, 200 mituns pó vijité vigni dé posc por fá la blëita y 60 ëres fej para pro seminars da cují. Le proiet á metü man tl forá dl 2014 y les ativités por i mituns y les ëres vá inant ince por merit dl sostëgn de partners locai. Implü él gnü organisé dui convëgns y na mostra fotografica en colaboraziun cun l’Université de Balsan. Le proiet, che á n budget complessif de 59mile euro, vëgn sostigní dala Provinzia cun 41mile euro. Dui d’atri proiec d’emergënza tl Libanon y dla Iordania – che reverda la destribuziun de alimentars y de medejines – vëgn finanziá dala Provinzia cun 100mile euro por daidé i profugs dla Siria y dl Libanon.
rc
