Atualità
Bilanz meteo dl mëis d’aurí: süt, cialt y dër da sorëdl
Ince sce al á ploiü tles ultimes ores tl Südtirol, él gnü registré tl mëis d’aurí tröp sorëdl y dër pücia plöia: chësc é le ressüme mensil dl Sorvisc meteo dla Provinzia. Sön gran pert dl teritore él tomé na cuantité de plöia danter le 10 al 40 porcënt dl valur mesan, les temperatöres é romagnüdes danter 1 y 1,5 degrá sura i valurs plurianuai. La dé plü cialt é sté ai 22/04 a Auer cun 27,5°
La localité plü süta dl mëis de aurí é stada Salurn cun ma 3 mm de plöia, la plü gran cuantité de prezipitaziuns é gnüda registrada ala staziun meteo de Ridnaun cun 53 mm. Tl mëis de aurí, insciö nes informëia le Sorvisc Meteo dla Provinzia, é les temperatöres romagnüdes de 1 y 1,5 degrá sura le valur mesan de plü agn dala perioda tlimatica dl 1981 al 2010.
Le dé plü cialt é gnü registré ai 22 de aurí, canche a Auer á le termometer segnalé 27,5 degrá y chël plü frëit é sté ai 6 de aurí a Toblach cun manco 8,2 degrá. Le mëis d’aurí dl 2015 é sté un cun les maiú ores de sorëdl ti ultims agn, a Balsan él gnü cumpedé indöt 260 ores de sorëdl. Le mëis d’aurí é tradizionalmënter n mëis cun de gran desfarënzies tlimatiches: tla Val de Puster él gnü a se le dé ai 24 de aurí de plü temporals cun indöt 380 tarlis, la nöt dl dé dedô al novü a Sexten. Ince incö (30 de aurí) él tomé n per de zentimetri de nëi söl Prener. Por ci che reverda le mëteman de má, él les previjiuns dl Sorvisc meteo dla Provinzia che dij tëmp variabl cun sorëdl, niores y valgügn temporai.
rc
