Atualità
Portal internet dl’Euregio sön la Gran Vera: L’entrada te vera dla Talia
www.14-18.europaregion.info é la misciun dl portal web dl’Euregio Tirol-Südtirol-Trentin che é dediché al centanar dla Pröma Vera Mondiala. Tla seziun „Let’s talk“ vëgnel aprofondí vigni mëis temesc nüs, cun domandes y respostes: tl mëis de má nen vara dl’entrada tl conflit dla Talia, che ai 23 de má dl 1915 ti á detlaré vera al’Austria-Ungheria.
Tla seziun „Let’s talk“ dl portal internet www.14-18.europaregion.info , le portal metü adöm dales Provinzies dl Südtirol, Tirol y Trentin, él l’Euregio che presentëia vigni mëis tematiches nöies coliades a na scomenciadia o a n evënt che reverda la Pröma Vera Mondiala cun trëi domandes y trëi respostes de esperc dla storia locala. Por chësc mëis él l’Euregio che presentëia le tema dl’entrada te vera dla Talia, che ti á detlaré vera ai 23 de má dl 1915 al Imper austroungarich y che á porté ala spartiziun dl Vedl Tirol y dla Ladinia.
Cun chësta dezijiun â la Talia desmostré süa alianza nöia cun la „Triple Entente“ formada dala Terza republica franzeja, l’Imper britanich y l’Imper rus, y deventâ tl medemo momënt le nemich dl Imper austroungarich. Por le raiun dl Trentin-Südtirol â chësta dezijiun porté para a n dejorientamënt dla popolaziun y ala daurida de n frunt de vera dan ciasa. Daimpröma ê la vera dalunc da ciasa sön le frunt oriental, sëgn êl le conflit rové dan porta y cuntra n vijin cina da püch amich.
Chësta tematica, che á porté tröp dolur sön le frunt dles Dolomites, gnarà aprofondida dai esperc de storia locala Oswald Überegger y Nicola Labianda ai 9 de jügn en gaujiun dla presentaziun dl liber „Krieg in den Alpen“ tla biblioteca provinziala dla Teßmann a Balsan. De plü manifestaziuns sön chësta tematica é preodüdes te döt le Vedl Tirol, informaziuns plü avisa é da ciafé sön: www.14-18.europaregion.info/.
rc
