Atualità
Renzi a Balsan: formaziun duala n model por la Talia (2)
„La formaziun duala dla Provinzia de Balsan, che prevëiga l’alternanza danter scora y laur, é n model che i orun ince adoté tl rest dla Talia“. Cun chëstes parores á le premier Matteo Renzi stlüt jö incö (ai 5 de má) süa vijita al’intern dl’aziënda Stahlbau Pichler de Balsan, tratan chëra che al é gnü acompagné dal presidënt Arno Kompatscher y dala Junta provinziala.
Do l’incuntada cun i presidënc Arno Kompatscher y Ugo Rossi tl aeroport da Baslan á le premier Matteo Renzi vijité incö ( ai 5 de má) adöm ala Junta provinziala dl Südtirol l’aziënda dla Stahlbau Pichler, n’impreja tla zona industriala da Balsan. „I podun ester dër capazi de n’aziënda sciöche chësta, che é stada buna da anuzé les poscibilités zënza messëi les aspeté sciöche l’oportunité che ti é gnüda pitada tres l’Expo da Milan.“ Bëgn indöt nü paiuns dl’esposiziun mondiala, danter chisc ince chël dla Talia, é gnüs fac sö dal’impreja da Balsan che é spezialisada tla realisaziun de costruziuns de aciá, spidl y metal.
Mo le messaje prinzipal de Renzi y Kompatscher é sté incö dantadöt n orientamënt nü dl sistem de formaziun dla Talia por les generaziuns dl dagní. „La Provinzia de Balsan á la porcentuala de dejocupaziun jonila plü basa dla Talia – á sotligné le presidënt dla Provinzia Kompatscher – y na buna pert dl mirit de chësc dat é la conseguënza dl sistem de formaziun dual che coliëia le lernerat te n’aziënda cun n percurs formatif spezifich. L’aternanza scora-laur ti consënt ai lerneri da adoré sües conescënzes te na manira pratica y da colié insciö le savëi a le fá: na carateristica d’ezelënza dl Südtirol che á contribuí a formé na sozieté caraterisada dal bëgnester.“
„I sun chiló por copié le Südtirol – á ajunté le premier Renzi – y por esporté chësc model de formaziun profescionala ince tl rest dla Talia. Indlunch olache al vëgn adoré le sistem dual, sciöche por ejëmpl tl’Austria, ti Paisc Todësc y tla Svizra, é la porcentuala de dejocupaziun jonila dër plü basa en confrunt di atri paisc europeics. Tl Südtirol é la porcentuala di jogn zënza laur cater iadi plü basa co tl rest dla Talia y chësc nes confermëia chësta teoria. Plü lernerat porta a n smendrimënt dla dejocupaziun y a na reorganisaziun dla formaziun scolastica: cun chësc ne orunse nia ti tó demez ales istituziuns tlassiches sües competënzes, mo les integré cun n sistem capazé da renforzé l’istruziun ala pratica dla formaziun tles aziëndes.“
A inom dla Junta provinziala ti á le presidënt Arno Kompatscher surandé al premier n documënt te chël che al vëgn proponü da ajorné n valgönes perts dl test unich sön le lernerat che vëgn atualmënter elaboré da pert dl Govern y dl Parlamënt. Danter les propostes él ince da ciafé chëra de n’aplicaziun manco strënta dles normatives europeiches che reverda le laur jonil (en atuaziun bele ti Paisc todësc y tl’Austria) sciöche ince de n coliamënt dl lernerat cun l’ejame de Stat che portass a la surandada de n diplom profescional de valüta plëna.
Na seria de fotografies dla vijita de Renzi pó gní consultada vijitan chësc link.
rc
Galaria dales fotografies
Foto USP/Othmar Seehauser
