Atualità
Stocker: „La donaziun de sanch é n sëgn important de solidarieté“
L’assessuria provinziala por la sanité y les politiches soziales, Martha Stocker, á fat da püch na vijita ala sënta dl’Assoziaziun nazionala di volontars dl sanch (AVIS) tl ospedal da Balsan y á podü costaté le laur intensif che é gnü fat l'ann passé, tratan chël che al é gnü coiü adöm passa 7.900 donaziuns de sanch da 6.080 donadus.
Tratan la vijita che l’assessuria provinziala Martha Stocker á fat da püch tla sënta dl’Assoziaziun nazionala di volontars dl sanch (AVIS) tl ospedal da Balsan ti él gnü presenté les ativités che l’organsiaziun á metü da jí l’ann passé, olache al é gnü coiü adöm tla sënta de Balsan indöt 7.900 donaziuns de sanch. I donadus é stá döt adöm 6.080.
Le presidënt dla seziun da Balsan dl AVIS Diego Massari á splighé che l’ann passé é les donaziuns aumentades de 450 unités en confrunt al 2013. La gran valüta de chësc aumënt de donaziuns é ince gnü sotligné dal presidënt provinzial dl AVIS Erich Hanni y dala vize presidënta Martina Knapp. Chësc aumënt é, secundo i esperc, gnü a se le dé sciöche conseguënza ince dles aziuns de sensibilisaziun che é gnüdes organisades ti ultims mëisc te döta la provinzia.
L’assessuria Martha Stocker á rengrazié tratan la vijita l’AVIS por so laur, dantadöt i volontars che á desmostré na gran solidarieté y é stá de gran aiüt por la popolaziun. L’AVIS tolará ince pert ala sëra d’informaziun dla campagna de sensibilisaziun provinziala „Scinca vita“ che gnará tignida endoman, mertesc ai 12 de má, dales 19:30 tl salf dles rapresentanzes dla Ciasa de Comun da Balsan.
rc
