Atualità
23/05: Comemoraziun dl centenar dla Gran Vera a Desproch tl sëgn dl'Euregio
En sabeda ai 23 de má vëgnel metü da jí a Desproch, en presënza di trëi presidënc dl’Euregio Günther Platter (Tirol), Arno Kompatscher (Südtirol) y Ugo Rossi (Trentin), la comemoraziun publica dla Gran Vera avisa cënt agn do l’ingres dla Talia tl conflit. La comemoraziun religiosa gnará tignida dai trëi vëschi dles diozejes, daldô él preodü n’incuntada di trëi presidënc.
Avisa tl dé canche dan da 100 agn la Talia á detlaré vera al’Asutria él les trëi provinzies dl’Euregio che ó recordé deboriada chësc aniversar tragich y dolorus por sotligné l’importanza da costruí adöm punc por la pesc. Düc i zitadins y dötes les zitadines é inviá y inviades a tó pert ala manifestaziun de comemoraziun che gnará tignida en sabeda ai 23 de má a Desproch dales 10 sön la plaza dan le „Landestheater“ tirolj (Rennweg 2).
La zelebraziun religiosa gnará tignida dal arzivësco de Trënt Luigi Bressan y dai vëschi de Balsan-Porsenú Ivo Muser y da Manfred Scheuer dla diozeja de Desproch. Dedô sarál le presidënt tirolej Günther Platter che tignará n discurs.
Dales 13.30 jará spo la manifestaziun inant tla curt interna dla Hofburg de Desproch, olache i jogn tignará na discusciun sön la storia, sön la situaziun atuala y dl dagní. I davagnadus dl contest „Youth Song Contest“ tirolej presentará en chësta ocajiun sü laurs sön la tematica dla pesc. Daldô gnarál a se le dé n’incuntada di trëi presidënc Platter, Kompatscher y Rossi. Le dé jará a piz cun n conzert de musizisć da döta l’Euregio.
rc
