Atualità
Dala Junta:Plü corieres a idrogen, trasport de marcianzies, program dla SMG
La Junta provinziala á aprové incö (19/05) danter l'ater la partezipaziun a n program europeich de promoziun por la cumpra de corieres a idrogren. Implü á la Junta dé löm vërda a n documënt de mascima por le passaje dl trasport de marcianzies sön les scines y por le smendrimënt dl trasport sön strada. Arat positif ince por le program dles ativités dl 2015 dl'aziënda Südtirol Marketing (SMG).
L’Uniun Europeica vëiga ite la nezescité da smendrí la cuantité de emisciuns de anidride carboinca cun mosöres aposta, danter l’ater ince tres l'aumënt di mesi de trasport eco-sostenibls y che vëgn alimentá a idrogen. L’UE á insciö lauré fora n program spezifich de motivaziun por sostigní cun finanziamënc aposta l'adoranza de corieres eco-sostenibles. I obietifs é chi da arjunje na cuota de 500 corieres a idrogen che zircolëia te Europa cina le 2020 y da daidé i produturs da smendrí i cosć por corieres nöies. La Junta provinziala á concordé incö, mertesc ai 19 de ma, da tó pert al program de sovenziun dla Comisciun europeica y che prevëiga le finanziamënt en gran pert di cosć pro la cumpra de corieres a idrogen nöies. „Chësc program dl'UE é na buna poscibilité por finanzié da öna na pert le barat dles corieres plü vedles, che messâ impó gní ajornades, y da sostigní na mobilité plü vërda“, á splighé l’assessur por la mobilité Florian Mussner, che sotlignëia che chëstes mosöres porta para a n smendrimënt dl incuinamënt costant y a n aumënt dla sconanza dl tlima te Südtirol (y che fej ince pert dl plann dl „KlimaLand“). L’assessur Mussner firmará adöm ai atri 29 partners na lëtra de intenziuns che ti gnará dada jö ala Comisciun europeica. Les corieres a idrogen é bele na realté tl Südtirol da dui agn – insciö l’assessur por la mobilité che sotlignëia che „ince la resposta da pert dla popolaziun é dër positiva, conscidran che les corieres nes pita les medemes prestaziuns co les atres mo zënza degun incuinamënt.“ Les corieres a idrogen che zircolëia te Südtirol é lungies 12 metri y cun n tanch plëgn fejeres zirca 350 chilometri.
N’atra dezijiun dla Junta provinziala é stada incö l’aprovaziun de n documënt de mascima elaboré da n grup de laur che reverda le spostamënt dl trasport dles marcianzies dales strades sön les scines. Tl trasport dles marcianzies é döes dles priorités dla strategia dla Junta la costruziun dl tunel de basa dl Prener y le spostamënt dl trasport sön les scines. „Le coridor dl Prener é chël che á la maiú cuantité de trasport de marcianzies sön strada tles Alpes y che á debojëgn de n spostamënt dl trasport sön les scines, dantadöt por smendrí l’incuinamënt ambiental y acustich“, á sotligné le presidënt dla Provinzia Arno Kompatscher. Por sostigní chësc spostamënt á la Junta provinziala aprové incö n documënt de mascima por le passaje dl trasport de marcianzies dala strada sön les scines. Le documënt é gnü lauré fora da n grup de esperc y reverda, danter l’ater, l’ampliamënt dl’autostrada „sön les scines“ (autostrada viaggiante) ROLA, che tl dagní dess jí dal Prener cina Trënt y che gnará realisada cun material aposta por smendrí l’incuinamënt acustich. Le grup de laur é ince a öna por na perioda de proa de n limit dinamich dla velozité sön l’autostrada A22 tles trates cina Porsenú, Balsan y tl Unterland, sce i limic de incuinamënt sön chëstes trates ess da gní superá. Implü él preodü tl documënt ince l’inserimënt de „Toll+“, n daz europeich ajuntif por mesi de trasport dër gragn che incuinëia le plü. Le documënt aprové incö dala Junta messará sëgn gní debatü cun Trënt y Desproch.
La Junta provinziala á implü aprové incö le program dles ativités por le 2015 dl’Agenzia Südtirol Marketing (SMG) che ti mët a desposiziun al’agenzia ressurses finanziares de 14 miliuns de euro por le setur dl turism y 660mile euro por le comerz y i sorvisc. Tres chëstes ressurses él preodü de plü investimënc tl marcé dla Ruscia, che á de gran potenzialités de svilup. Implü á la SMG planifiché por le 2015 na strategia de comunicaziun unitara cun al zënter düc i sorvisc, nia ma tl turism, dl Südtirol. L’Agenzia de Südtirol Marketing laorará implü sön na strategia de internazionalisaziun dl Südtirol, dantadöt por ci che reverda les tematiches dl’azessibilité, dl posizionamënt tl marcé y dl’inovaziun.
rc
