Atualità
Euregio: Scomenciadies por i jogn y presentaziun deboriada al EXPO
27 proiec cun n budget anual de 1,9 miliuns de euro é le resultat concret dl GECT dl'Euregio: la ligna di proiec é gnüda presentada incö (28 de ma) te na sentada dla Junta dl’Euregio dlungia Lienz, cun i trëi presidënc Günther Platter (Tirol), Arno Kompatscher (Südtirol) y Ugo Rossi (Trentin). Proscimamënter él preodü n portal dediché ai jogn y na partezipaziun deboriada al EXPO.
Colié les porsones, les porté adöm y mët en rëi: chësc é le conzet prinzipal de düc i proiec realisá deboriada dal’Euregio. Le svilup dl program anual y i proscims vari é gnüs presentá incö, jöbia ai 28 de ma, tl contest dla nona sentada generala dla Junta dl GECT (Grup europeich de cooperaziun transfrontaliera) a Iselsberg (Tirol) en presënza di trëi presidënc. „Nosta intenziun é chëra da realisé sorvisc nüs por düc i zitadins dl Tirol, Südtirol y Trentin y da anuzé les sinergies. Mosöres conretes é de vantaje por la popolaziun y aumentëia la conscidraziun dl’Euregio“, á dit le presidënt tirolej Günther Platter, presidënt de turnus dl GECT.
L’Euroregiun davagna insciö ann por ann de plü importanza, sides danter la jënt co tl raport cun l’Uniun Europeica. „I sun düc sigüsc dla valüta de chësc proiet che é n stromënt istituzional de coliamënt danter les regiuns y cun l’UE, a chël che i orun ti dé tres de plü pëis,“ á prezisé le presidënt Kompatscher. Te chësc contest é la colaboraziun danter i trëi raiuns dër importanta, „dantadöt por chi che reverda i jogn, la formaziun, l’archirida, la cultura y la sanité“, á sotligné le presidënt trentin Ugo Rossi.
Insciö sará un di proiec che gnará realisá tosc n portal internet dediché ai jogn (cun informaziuns sön la mobilité, la cultura, le stüde, les ofertes de laur) y na cherta di vantaji, n proiet che é gnü realisé da n grup de studënc dl MCI da Desproch. Implü se presentará l’Euregio dai 10 ai 16 de messé al EXPO de Milan pro le stand dl Südtirol. N ater proiet che reverda l’Expo é le coliamënt dla „Coriera dl’Euregio“ che garantësc le sorvisc de trasport danter Desproch-Balsan-Trënt-Milan cina ai 31 de otober.
Tratan la reuniun a Lienz él ince gnü stabilí da jí inant cun plü iniziatives bele scomenciades, sciöche por ejëmpl l’Euregio Pass por families, l’Euregio Summer Camp, l’Euregio Sportcamp, le fonds scientifich Euregio, le calënder cultural dl’Euregio y le boletin dles lovines. De plü detais sön les scomenciadies pon ciafé sön www.europaregion.info/.
rc
Galaria dales fotografies
