Atualità
Partezipaziun dles porsones cun handicap: Presenté le ddl nü
„Ester na pert amesa la sozieté, y nia ma na pert che alda lapró“: chësc é le moto dl dessëgn de lege nü sön la partezipaziun y l’intlujiun dles porsones cun handicap tl Südtirol y che é gnü aprové da püch dala Junta provinziala. Incö, mercui ai 3 de jügn,él gnü presenté les tematiches prinzipales dla lege nöia, le percurs che portará al’aprovaziun y le test de lege te na forma scemplificada.
Tres na plataforma sön internet, tratan de plü incuntades y conferënzes y cun l’aiüt de na seria ampla de grups de laur y de coordinamënt de indöt önesc Repartiziuns provinziales âl lauré para al dessëgn de lege che reverda l’intlujiun de porsones cun handicap na cumpëda de 300 porsones. Denant che la lege vëgnes ejaminada dala comisciun legislativa competënta dl Consëi provinzial á l’assessuria Martha Stocker, adöm cun le diretur dla Repartiziun Politiches soziales Luca Critelli, la rapresentanta dles trëi Intendënzes scolastiches Maria Rita Chiaramonte y la direturia dl Ofize Porsones cun handicap Ute Gebert presenté le dessëgn de lege nü incö (03.06) a Balsan.“Al é important che le prozes de colaboraziun vais ince inant tratan l’elaboraziun dles normes d’atuaziun“, á sotligné l’assessuria Stocker, che á recordé dantadöt les sfidades che reverda le laur y l’abité por chëres che la Junta á metü a desposiziun chësc ann 1,2 miliuns de euro implü. „Öna dles ghiranzes personales che me é stades dër a cör é chëra de avëi n test de lege ince te n lingaz scëmpl che pois gní capí diretamënter dales porsones interessades“, insciö l’assessuria provinziala.
La direturia d’Ofize Ute Gebert á presenté i punc zentrai y l’orientamënt dla lege, che á sciöche obietif primar le smendrimënt de barieres desvalies al’intern dla sozieté. „I sun stá bugn da inserí normes te düc i seturs che é importanc por les porsones cun handicap y che dess ti alisiré l’inserimënt tla sozieté“, á dit Gebert. Insciö él preodü de plü mudaziuns ti seturs dla familia, dla scora y educaziun, dl laur, dla partezipaziun ala vita publica, dl abité, dla sanité, dl tëmp lede, dl sport, dl turism, dla mobilté, dl azessibilité y dla coordinaziun. Por ci che reverda l’aspet dl laur y abité él planifiché n’oferta de aconsiamënt por n passaje asvelt dala scora al monn dl laur sciöche ince l’assistënza por dependënc y lauranc. Ince tl setur dl abité ti dessel gní amplié les poscibilités ales porsones cun handicap, por che ai pois manajé süa vita te la maiú autonomia poscibla.
Na comisciun de monitoring ará la funziun de control sön la prozedöra de realisaziun y atuaziun dla lege che dess gní adatada ala convenziun dles Naziuns Unides. Ince les porsones interessades dess avëi la poscibilité da colaboré ala realisaziun dla lege nöia. Tl setur dla scora é le punt prinzipal, do la minunga dla rapresentanta dles Intendënzes Maria Rita Chiaramonte, l’aumënt cualitatif dl sistem scolastich y dl personal didatich. „N punt fondamental dl’intlujiun garatada reverda dantadöt la cualité dl insegnamënt y le dessëgn de lege nü vá te chësta direziun“, insciö Chiaramonte.
Ala conferënza stampa de presentaziun ál ince tut pert Hansjörg Elsler, presidënt dl grup de laur di geniturs cun mituns cun handicap y i rapresentanc dl’organisaziun por posones cun dificoltés de aprendimënt (People First) Robert Mumelter y Karin Pfeifer che á ince lauré para al dessëgn de lege.
rc
