Atualità
Gran Vera: L’economia é la tematica prinzipala tl mëis de jügn
www.14-18.europaregion.info é la misciun che porta al portal web dl’Euregio Tirol-Südtirol-Trentin dediché al centenar dla Gran Vera. Tl mëis de jügn vëgnel ejaminé da plü daimpró l’economia finanziara tratan la Gran Vera, cun l’emisciun de papiers de valüta statai y i pröms voucher dl Comun de Balsan.
Tla seziun „Let’s talk“ dl portal internet www.14-18.europaregion.info, le portal metü adöm dales Provinzies dl Südtirol, Tirol y Trentin, él l’Euregio che presentëia vigni mëis tematiches nöies coliades a na scomenciadia o a n evënt che reverda la Pröma Vera Mondiala cun trëi domandes y trëi respostes de esperc dla storia locala. Te chësc mëis él l’Euregio che ti vá a funz ala tematica dla politica economica y finanziara tratan le conflit mondial. "Gut und Blut für's Vaterland!“ (Bëgns y vita por la patria) ê na frasa dla secunda strofa dl inn dl Impêr austroungarich. Tl tëmp de vera ne messâ nia ma la popolaziun renunzié a na seria de sorvisc y ghiranzes, mo al ti gnô ince damané n gröm de sforc finanziars. Do l’euforia tl scomenciamënt dla vera, cun la convinziun che la vera dô avëi na dorada cörta y cun na devënta sigüda, s’â le sentimënt dla popolaziun trasformé te dejilujiun y soferënza: la rassegnaziun gnô tres plü grana, les mangiaries tres de manco y i investimënc te papiers de valüta statai ê zënza valüta.
Tl mëis de jügn gnarál insciö aprofondí sön la plata internet dla Gran Vera les tematiches dl’emisciun de papiers de valüta statai „imprësć de vera“ por finanzié les aziuns de vera, i placac de comunicaziun sciöche mesi de propaganda y i pröms voucher scric fora dal Comun de Balsan por gaujia dla mancianza de monëda reala dal 1918 inant.
La tematica dl’economia tratan la Pröma Vera Mondiala vëgn ince analisada da na mostra tl Museum mercantil de Balsan, te chëra che al vëgn ince splighé le rode dla Ciamena de Comerz tratan la perioda dla pröma vera y ti pröms agn do la fin dla vera. Plü informaziuns sön la mostra pon ciafé sot a: www.camcom.bz.it/it/servizi/altri-servizi/museo-mercantile/mostre-temporaneerc
Galaria dales fotografies
