Atualità
Adoziun: Cursc de preparaziun por pers interessá
„Adoziun: na dezijiun cosciënta“ á inom le curs de preparaziun por pers che se arjigna ca a n’adoziun y che vëgn organisé dal Sorvisc Adoziuns sön inciaria dla Repartiziun Politiches Soziales. Le curs é ponsé por pers che é interessá a n’adoziun o che é tl adoté mituns. Les iscriziuns é bele davertes.
Tl contest dla campagna de sensibilisaziun „Na storia n pü'atramënter: mia adoziun“ vëgnel organisé n curs de preparaziun por pers che á l’intenziun da adoté mituns. „Eduché mituns y mitans ne é nia n compit saurí y che porta para na gran responsabilité. La sfidada é ciamó plü grana sce i mituns ne é nia i tü“, á splighé l’assessuria por les politiches soziales Martha Stocker che á sotligné che „le curs de preparaziu é na buna ocajiun por se dé jö cun chësta tematica.“
Tratan le curs él i pers che á l’ocajiun da ponsé do sön süa motivaziun da adoté y eduché i mituns, da imparé da conësce les nezescités di mituns y da analisé les desfarënzies danter geniturs naturals y geniturs cun mituns adotá. Implü gnarál dé plü informaziuns d’ütl sön le prozes d’adoziun. Al curs ne tolarál nia ma pert de plü esperc dla tematica dl’adoziun, mo ince geniturs y mituns che cuntará de sües esperiënzes diretes.
Le curs sará ince na poscibilité d’informaziun sön les desfarënzies nazionales y internazionales, al gnará ince aprofondí la pert legislativa, soziala y psicologica.
Le curs é despartí sö te cinch sëres de curs y un n de intier. Le curs de preparaziun por todësch gnará tigní ai 29 de setëmber, ai 6 de otober, ai 3 y ai 10 de novëmber dales 19.00 ales 21.30 tla Ciasa dles families a Firmian a Balsan (plaza Montessori 10) y ai 17 de otober dales 09.00 ales 12.30 y dales 14.00 ales 17.30 tla Ciasa dla Cultura Lichtenburg a Nals. Interessá po se scrí ite debann al curs. Le formular d’iscriziun pó jí desciarié sot a: http://www.sozialbetrieb.bz.it/documenti/Anmeldeformular_Modulo_iscrizione_2015.pdf. Do la compilaziun mëss le formular gní mené ala Ciasa dla Formaziun Lichtenburg, strada Vilpian 27, 39010 Nals (fax. 0471 057119, telefon: 0471 057100, E-Mail-Adresse: bildungshaus@lichtenburg.it). Plü informaziuns pon ince ciafé sot al numer 0471 418225.
Le curs de preparaziun por talian vëgn tigní ai 21 y ai 28 de setëmber, ai 19 y 26 de otober, ai 2 de novëmber tres ales 19.00 ales 21.30 tla Ciasa dles families a Firmian a Balsan (plaza Montessori 10) y ai 10 de otober dales 09.00 ales 12.30 y dales 14.00 ales 17.30 tla Ciasa dles families "Haus der Familie - Casa della Famiglia" a Lichtenstern. Interessá po se scrí ite debann al curs. Por l’iscriziun prëibel contaté diretamënter le Zënter de formaziun “"Haus der Familie - Casa della Famiglia", Lichtenstern 1/7, Balsan, Tel. 0471 345172, Fax 0471 345062, E-Mail: hausderfamilie@hdf.it.
rc
